ISITESHI esenza inzuzo saseThekwini, iVuma 103 FM, sihlabane ngomsakazi osenamava, uZookey Zarling, owashiya kwiGagasi FM ngemuva kokungahoshelani nozakwabo.
UZookey uzokwethula uhlelo lwangempelasonto phakathi kuka-2 ntambama no-6 ebusuku. Umthombo ongashayi eceleni uthe iziphathimandla zilande uZookey, osebuya nakwi-East Coast Radio neKwekwezi FM yaseMpumalanga, ngenxa yamava akhe.
“Ngimbone engena ephuma emahhovisi eVuma ngoLwesine futhi encokola nabaphathi kucaca ukuthi kunesivumelwano okufinyelelwe kuso. Ubuye wagonana nabanye abasakazi beVuma,” kusho umthombo.
Ebuzwa uZookey ucele ukungaphawuli lutho kodwa wathi akukhulunywe neVuma “mhlawumbe abaphathi bakhona bayazi ukuthi ukhuluma ngani ngoba mina angazi lutho.”
Kuthintwa umphathi wezinhlelo kwiVuma, uPatrick Bogatsu, akayanga le na le kodwa uvele wavuma ukuthi uZookey usezoba ngumsakazi omusha wesiteshi esizinze eMhlanga. Uhlelo azolwethula belwethulwa nguMathumo Manaka kodwa ngempelasonto eyedlule belubanjwe wuLinda “The Game” Ndimande kanti kule esiphuma kuyo belusakazwa wuVanessa Marawa.
Umthombo uthe uBogatsu uyakholelwa kakhulu ekhonweni likaZookey futhi nguye owamthungatha waze wamthola ukuze asakaze kwiGagasi.