UMHLELI weFact Durban Rocks, uDJ Tira, uthi bayasiqonda futhi bayasihlonipha isinqumo sikaDJ Zinhle sokuhoxa emcimbini iFact Durban Rocks ezoba sePeople's Park, eMoses Mabhida Stadium, ngoJulayi 1.
U-DJ Zinhle ucashunwe ephephandabeni iSowetan lapho ethe akakulungeli ukuba seThekwini. ITheku yilapho okwadutshulwa kwabulawa khona umrepha u-AKA onguyise wendodakazi yakhe uKairo Forbes.
U-AKA wadutshulwa wabulawa ngo-Febhuwari, engaphandle kwendawo yokudla iWish kuFlorda Road. Akukaboshwa muntu ngalesi sigameko.
U-DJ Zinhle ucashunwe ethi usashaywa wuvalo uma ecabanga ngokuba seThekwini.
"Kusazongithatha isikhathi ngaphambi kokuthi ngibe seThekwini. Ngidlula esikhathini esinzima. Khohlwani ngokungibona eThekwini. Angilicasukele iTheku kodwa kunzima. Kusaphele izinyanga ezintathu kuphela kushone uKiernan (AKA), mhlawumbe ngesikhathi (kuzoba ngcono). Nginethemba lokuthi ngeke ngiwushintshe umqondo," kusho uZinhle.
Uqhube wathi unovalo ngosuku lobaba ngenyanga ezayo.
"Ngizothini kuKairo ngosuku lobaba?"
Nonina ka-AKA, uLynn Forbes, usanda kukhuluma ohlelweni lukaCarol Ofori kwi-East Coast Radio, lapho ethi akanayo intshisekelo yokuya kuleli dolobha okwamanje. Uthe akakholwa ukuthi ngeke aphinde alubhade eThekwini.
"Sisiqonda ngokugcwele isinqumo sakhe futhi siyameseka," kusho uDJ Tira.
"Esikhaleni sakhe sesifake uLKG uLerato Kganyago."
UTira uthe amalungiselelo omcimbi ahamba kahle futhi basazophuma izinkalo bazisa abantu ngawo.
Kulo mcimbi kuzonandisa uBig Zulu, Sjava, Marumba Pitch, Kabza de Small, Blxckie, Dlala Thukzin nabanye.
Kuzobe kuneziteji ezimbili lapho kuzonandisa khona abaculi noDJ.
Amathikithi aseqalile ukudayisa eTicketpro.