IPHUTHUNYISWE esibhedlela intokazi engumlingisi ebuye ibe inkosikazi kaDJ Black Coffee, u-Enhle Mbali Mamphumulo, ngemuva kokuhlaselwa yizigebengu ezizame ukumphuca imoto izolo ntambama enxanxatheleni yezitolo iHyde Park Corner, eGoli.
Kulesi sigameko izigilamkhuba zigcine ngokuthatha ubucwebe bale ntokazi nesikhwama sayo ebisiphethe.
Kuthiwa ngesikhathi kwenzeka lokhu ubehamba yedwa eyocosha igilosa encane yezingane.
Umthombo ongashayi eceleni ozifikele wona la kwenzeke khona lesi sigameko uthe, u-Enhle ubethuke kakhulu ngemuva kwalesi sigameko.
"Mina ngimfice esehleli emotweni yabosizo lokuqala bembheka njengoba indlela abethuke ngayo ibimangalisa. Ugcine ngokuthi ahanjiswe esibhedlela njengoba bekungehli ukuthukwa kwakhe kwabonakala ukuthi kungcono ayobonwa odokotela," kusho umthombo.
Uthe iringi yakhe yomshado nobunye ubucwebe akade ebugqokile izigilamkhuba zishaye utshani nabo.
"Imoto ikhona abayithathanga yona, siyabonga nje ukuthi uyaphila futhi akalimalanga kulesi sigameko kodwa indlela akade bemphethe ngayo benza lesi sigameko imshiye ephatheke kabi kakhulu," kuqhuba umthombo.
Imenenja ka-Enhle Mbali, uJarred Doyle nayo ikuqinisekisile ukuthi le ntokazi isibuyele ekhaya.
"Usebuyele esimweni manje futhi akalimele ndawo. Nami ngifike la kwenzeke khona lesi sigameko ngamthola esekhona kodwa okuningi angikwazi," kusho uJarred.