NAMHLANJE kulindeleke ukuba kuhlephuke imbadada maqede kushunqe uthuli lubheke phezulu emqhudelwaneni wengoma yaminyaka yonke eCurries Fountain Stadium eThekwini kusukela ngo-9 ekuseni. Lo mncintiswano, owenziwa yiPlayhouse Company, okuyisikhungo sezobuciko esingaphansi koMnyango wezeMidlalo, ezobuCiko namaSiko kuleli, uqeda iminyaka elishumi wasungulwa.
OyiNhloko noMqondisi wezobuCiko ePlayhouse, uLinda Bukhosini, uthe selokhu lo mqhudelwano wasungulwa eminyakeni eyishumi eyedlule, izinga linyuka minyaka yonke. Uthe uke wahoxiswa iminyaka emibili ngenxa yokubheduka kwegciwane leCovid-19 ngo-2020.
"Kulo nyaka njengoba siguba iminyaka elishumi wasungulwa kuzobonakala amaqembu angu-42 edlana imilala ngenhloso yokuba imiklomelo ebekiwe kumunxa ngamunye, ulale kuwo. Amaqembu azohlulelwa ngendlela azonandisa ngayo emikhakheni eyisikhombisa, okungoweSigekle, uShameni, Ingoma Yezinsizwa, Ingoma Yezintombi, Ingoma YesiKhuze, Indlamu noMzansi," kuphetha uLinda.
Uhlelo lwale ndumezulu yomcimbi kulindeleke ukuba iphathwe wumsakazi ongomunye wezikhulu zeNanda 88.4 FM, uMapule nowayesakaza oKhozini, uJuba Special.
Kulindeleke ukuba izihlwele zifike ngobuningi bazo njengoba kuzobe kungenwa mahhala njengenhlalayenza.
