ABADIDIYELI bomdlalo owuchungechunge, osihloko sithi Blood and Water, bahambela phezulu kulezi zinsuku emuva kokuba lo mdlalo uvele waphuma phambili emdlalweni eyintandokazi e-USA. Lezi zindaba ziqinisekisiwe ngumdidiyeli walo mdlalo, uNosipho Dumisa, ekhasini lakhe lakuTwitter. Lena yingqophamlando njengoba kuqala ngqa ukuba kwenzeke emdlalweni waseNingizimu Afrika.
UNosipho uthe engezwa lezi zindaba, wavele waqonda kuTwitter wakhe, wabhala kanje: "Ngiphakamisa kuphela udumo kuNkulunkulu, iNkosi yami. IBlood and Water ihleli endaweni yokuqala e-USA. Ngiyabonga Ningizimu Afrika ngokusakhela isasasa elenze umhlaba wahluleka ukuzibamba kodwa wasihlonipha."
UBUFAKAZI bokuthi umdlalo wakuleli uyiqwaqwade yonke imidlalo e-USA Isithombe:TWITTER
Kosaziwayo abangene bahalalisela lo mdlalo ngalo mlando ewuqophile kubalwa uDineo Langa obenguKea kwiThe Queen, uNokuthula Mavuso owayelingisa kwiRhythm City nosomahlaya futhi ongumdidiyeli wamafilimu, uKagiso Lediga.
Lo mdlalo okhonjiswa kuNetflix bewuqala ukukhonjiswa kuleli sonto. Phakathi kwabalingisi ababoshelwe kuwo kukhona nomrepha waseThekwini uNasty C, uCindy Mahlangu, Gail Mabalane nabanye.