UMLINGISI wodumo kuMuvhango neGomora, uBrian Temba, kulindeleke ukuba akhumbuze abazohambela i-2nd Durban Soulful & Heritage Experience izikhathi zamzukwane, zoMarvin Gaye noTeddy Pendergrass. Okwenza lokho wukuthi uBrian uzobuye acaphune emanonini ezingoma ezikwi-albhamu yakhe yakamuva esihloko sithi It's All You. Lo mculi ozakhele udumo ngokudlala indawo kaRanthumeng kuMuvhango neka-Abdul uthe kule-albhamu ubuyise isigqi sezingwazi zeR&B sangeminyaka yo-1960. "Kunezingoma abantu abazozizwa sengathi bake baziwa phambilini kanti zintsha," kusho uBrian kwiTrue Love.
Le ncwasimende izobe ishiyelana inkundla nabanye abaculi abahlonishwayo emcimbini okulindeleke ube yindumezulu we-jazz e-ICC Arena, eThekwini kusukela ngabo-3 ntambama.
Kulo mcimbi sekuke kwanandisa izinkakha zabaculi ezidume umhlaba wonke, okubalwa kuzo, uHoward Hewett noKaryn White.
Kulo nyaka kuboshwele ezinye izilomo zomculo ongasoze wabuna okungo
Justin Lee Schultz (USA), Judith Sephuma, Ernie Smith, Billy Monama, Themba Mokoena, Neo Moroka, Linda Gcwensa, Grooves Assorted, Fanie Dick, Thobeka Ndlovu, Yommy Sax nabanye.
U-Schultz (14) wumculi odabuka kuleli onekhono lokudlala uxhaxha lwezinsimbi zomculo futhi oseke waqopha nomakadebona abanjengoJonathan Butler, Kirk Whalum, Gerald Albright, Eric Darius, Kenny Lattimore, Pieces of a Dream, Bob James noPaul Jackson Jr. Wabuye wachaza izihlabani ezingoBrenda Russell, Janet Jackson George Benson, Stevie Wonder noQuincy Jones, owaze wammema ukuba azomdlalela iphiyano.
I-Grooves Assorted yona seyike yacula nezihlabani zamazwe ngamazwe ezinjengoGlenn Jones, Howard Hewett, Eric Darius no-Alexander O'Neal futhi yashiyelana inkundla neThe Manhattans.
Amathikithi okuthamela umcimbi asatholakala eWebtickets nasezitolo zakwaPick 'n Pay ngoR250. Abantu bayagqugquzelwa ukuba basheshe bawathenge ngoba adayisa okwamagwinya ashisayo futhi akeqile ku-1000.