Umculi kamaskandi wasesigodini saseMgezankamba, eHlokozi, uLindokuhle "Secrete Code" Mbiko, ufuna ukugudluza abaculi asebezibiza ngamakhosi esicongweni.
USecrete Code (26) uthe lokhu akazokwenza ngomlomo kodwa uzokhulunyelwa yingoma. Lo mculi, oneminyaka eyishumi eyibambile insimbi ishisa kule ndima, uthe unengoma ashise kakhulu ngayo izikhotha nyakenye esihloko sithi Ngikunika Uthando.
"Ngiyikhiphe ngo-Okthoba, kuyo ngisebenze noNomagugu neMeya kaZwelonke.
Bayithande kakhulu abantu ezinkundleni zokuxhumana. Ukube beyidlaleke kahle emisakazweni, beyingabalwa nezingoma ebezingahlukanisa unyaka."
USecrete Code, owafunda eNongwinya Primary naseLusibalukhulu High, ungene emculweni kamaskandi ngengoma ethi Ngishikashikwa Zinsizwa kusukela ngo-2016.
"Kwathi ngo-2018 ngakhipha i-albhamu esihloko sithi Revolution360 neyayigabe ngezingoma eziwu-12.
Ngo-2020 ngabuya nomucu owawuthi 7 Billion Ngikhethe Wena. Kwathi ngo-2021 ngenza i-EP engangipike kuyo Inkosi Yamagcokama engomeni ethi Siyathandana Naye.
Iyona ngoma engaqala ukuvelela ngayo emculweni kamaskandi futhi nesadla umhlanganiso namanje ezinkundleni zokuxhumana."
Esephetha uSecrete Code unxuse abahleli bemicimbi ukuba bamnikeze naye ithuba ukuze akwazi ukuveza ikhono azalwa elifumbethe.
"Ngibonge kakhulu ukwesekwa kulaba ababambe iqhaza ekutheni umsebenzi wami uze ufinyelele kulesi sigaba, ikakhulukazi umphathi wami, uBaba uBhengu.
Ngibonge nabo bonke abathanda umculo wami."