UMCULI we-Afro-Soul, waseMgungundlovu uNkosinathi Zondo odume ngelikaKing N, usenxuse intsha ukuthi imvotele njengoba engomunye wabaqokwe emcimbini amaLive Your Dream SA youth awards.
UKing N kulo mcimbi uqokwe emunxeni weBest Artist yize esanda kungena emculweni.
Ekhuluma neSolezwe uthe ukhethe ukwenza okuhlukile njengoba ecela ukuvotelwa intsha, ngoba lona wumcimbi okhuthaza bona.
“Ngihambela amanyuvesi nasezikoleni ngicela intsha ukuthi ingivotele njengoba ngiqala nokuqokwa, selokhu ngingenile emculweni. Lona umcimbi wentsha ngakho kungangijabulisa kakhulu ukuthi ngiyithole ngenxa yontanga yethu le ndondo. Kungasho lukhulu kumina ukuwina le ndondo njengoba nginanengoma entsha engiyikhiphe ezinyangeni ezidlule ethi Marry Me eyenza kahle kakhulu,” kusho uKing N.
Uthe yize azi ukuthi akubona bonke abafundi abangamvotela kodwa akwenzayo kuhambisana nokukhombisa intsha ukuthi uma nje iqeda esikoleni ingaphumelela kwekwenzayo.
“Ngibonisa abanye abafuna ukungena emculweni ukuthi bangakwenza lokhu futhi baqokwe emicimbini yezindondo uma nje bezinikela esikoleni nasemsebenzini abawenzayo,” kusho yena.
Uthe abafuna ukumvotela bangathumela umqhafazo othi LYD 233 enombolweni ethi 33282.