KUKHALWA nxazonke ngokudlula emhlabeni kwengwazi yakuleli yomculo weR&B, uMarc Rantseli.
Ngokusho komfowabo abecula naye eqenjini eladuma kakhulu ngeminyaka yo-1980, iMarcalex, u-Alex Rantseli, umufi ushonele esibhedlela saseGoli ngoLwesithathu ebusuku emuva kokugula isikhashana.
Ekhuluma kwiMorning Live, u-Alex uthe umufi uqale ukuhlaselwa yisifo thizeni ebuchosheni eminyakeni emithathu eyedlule. Uthe wake wahlala izinyanga ezimbili esibhedlela kodwa wabuya kungaseyena uMarc abemazi. Eqhuba uthe ukufa kubuye kwamxina ngo-Okthoba 25, sekubhoke iHigh Blood Pressure njengoba egcine edlulile emhlabeni. Uchaze umufi njengomuntu obephilela umculo futhi uthe bagcine ukunandisa eState City emasontweni amabili adlule emuva kweminyaka emithathu benganandisi ngenxa yokuxinwa ngeminye imisebenzi. UMarc wazalelwa eDiepkloof, eSoweto, ngoJuni 28, 1965. Ngaphambi kokusungula iMarcalex, umufi ubengumdlali wopiyano.
IMarcalex yaqala ukuzakhela ugazi ezinhlangeni ezihlukahlukene ngengoma yayo eyayithi Quick Quick ngo-1988 futhi yaze yahlabana ngendondo yeBest Newcomer kuma-OKTV Awards ngonyaka ofanayo.
Kwathi ngo-1989 iQuick Quick yaqengqeleza phambili ezingomeni ezazidla ubhedu kuleli. Akugcinanga lapho kodwa ingoma yabo ethi Heartbreakin' Love yaphuma phambili ohlwini lwezingoma ezishisa izikhotha kwiRadio Metro (esiyiMetro FM) nakwiRadio 5 (esiyi5 FM).
Inoni labo elalithi Boys B Boys yilo elabadumisa umhlaba wonke. Ezinye izingoma ezachaza abantu abaningi bezinhlanga ezahlukene ngezithi My Love, My Life, My Everything, Hold You In My Arms, Enjoy, Never Never nezinye. U-Alex uthe uMarc ushiye emhlabeni indodana nendodakazi.
Kosaziwayo ababhonge emswanini kubalwa uMzwakhe Mbuli, Vicky Sampson, Tronix Modiba noTimothy Moloi. Kuze kwashaya isikhathi sokushicilela zingakaphothulwa izinhlelo zokufihla umufi.