ABASEMKHAKHENI wezikaqedisizungu bahlanganyele eRandburg, eGoli, namuhla njengoba abamaSama Award bebekhipha uhlu lwabaphakanyiselwe lezi zindondo.
Izolo Isolezwe libike ngokuthi umculi uSjava uyawazwela amajaji kulo nyaka ngoba ithalente likhulu.
“Ayaheha amaSama akulo nyaka ngenxa yethalente eligcwele. Ngiyabazwela bonke abakhetha ukuthi ngubani oqokwayo, bazothwala kanzima,” kusho uSjava ekhasini lakhe leTwitter.
Ngempela uma ubuka isigaba ngasinye, kuyacaca impela ukuthi kushubile kodwa kuyaziwa ukuthi uba yedwa umakhonya.
Abathanda umculo wesintu bazokuthokozela ukwazi ukuthi uShwi noMtekala baphakanyiswe ezigabeni ezimbili, kwiMaskandi of the year ne-Duo/Group of the year.
Naba abakhethiwe ngokwezigaba ezahlukene.
