WUQHUDE manikiniki mnikeze isongo lakhe, kubasakazi beziteshi zomphakathi abadlana imilalaemkhakheni weBest Radio Presenters kwiSicathamiya Music Awards eStableTheatre, eThekwini ngoFebhuwari 11, phakathi kuka-10 ekuseni no-5 ntambama.
Kulo munxa kuqhudelana uBonginkosi "BGK" Mbuyisa weVibe 94.7 FM, uDlabazane weHarry Gwala 88.8 FM, uMfundo “Mabetween” Mhlongo weNkandla 102.1 FM, uMzukisi Nqubula weNgwane FM 90.6/104.5mhz noSamkelisiwe Celiwe Ngwenya weZululand 97.0 FM.
Umgqugquzeli womcimbi uSaziso Dlamini, weSaziso Infortainment and Projects (SIP) uthe ukuvotela laba basakazi kuyavalwa kusasa ngo-12 ebusuku.
"Uvota ngokuthumela iSMS ebhalwe ukuthi SIP negama lomsakazi enombolweni ethi 47439."
USaziso ubuye wathi kuzovotelwa nabalandeli emkhakheni weMost Loyal Fan.
"Ungathola kalula indlela yokuvota ngokulandela izinkundla zokuxhumana zethu, ukutholaindlela yokuthola amathikithi okwesekela umcimbi ku-074 4029952."
Kulo mcimbi kuzobungazwa izinkakha zomculo wesicathamiya, iHlanganani, okuyiqembu elibophele izilomo zomculo kamaskandi, uMandla "Shwi" Xaba noZwelenduna "Mtekhala" Magubane. IHlanganani izoklonyeliswa ngomklomelo weLifetime Achievement Award.
Eqhuba uSaziso, uthe bonke abaqokiwe banethuba elilinganayo lokuthola indondo ekhethekile yabalandeli, ebizwa ngeMost Loyal Fan Award ezonikezwa lowo oqokiwe ozokwazi ukuzuza amavoti amaningi futhi ozokwazi ukudayisa amathikithi amaningi egameni lakhe njengentandokazi kubalandeli bomculo.
“Sithanda ukubonga kakhulu emajajini ngesikhathi sabo esiyizinsuku ezinhlanu zokwehlulela lo msebenzi, okubalwa nobusuku bonke ababuchithe ndawonye behlunga imingenelo ngendlela esezingeni eliphezulu.Siyaqonda ukuthi bekungewona umsebenzi olula lona. Kwesinye isikhathi bekuphoqa ukuthi balalele kaningana ngaphambi kokuthatha isinqumo okuyiso,” kuchaza uSaziso, obuye abe ngumsakazi weKhwezi FM.
Eqhubeka uthe owinile emkhakheni ngamunye uzohlomula ngesamba sikaR4000. Nansi eminye imikhakha okuqhudelana kuyo amaqembu esicathamiya: Best Africa Unite Song, Best Song of All Time, Best Collaboration, Best Awareness Song, Best Song of the Year, Best Live Performance, Best Isicathamiya Album neBest Upcoming.