NOKUBONGWA PHENYANE
INTOKAZI ebisihambe isikhathi esingangonyaka emdlalweni Isibaya, uZinhle Mabena-Ngwenya ikhuza ibuya kuwona.
UZinhle olingisa indawo kaSihle, uzoqala ukubonakala kulo mdlalo namhlanje, ngo-8.30 ebusuku kuMzansi Magic 161.
Kulo mdlalo ubaziwa njengowesifazane onenhliziyo embi njengoba ebefuna izinto zihambe kahle kuyena kuphela, elwa noQondi (Jessica Nkosi) naye ongasekho kulo mdlalo.
Ekhasini lakhe enkundleni yokuxhumana uTwitter uZinhle, uthe ujabule ukuphinde abe yingxenye yalo mdlalo.
“Ngiyabonga kakhulu ukungamukela ngezandla zombili njengoba sengibuyela kulo mdlalo. Ngijabule kakhulu futhi sengifisa iningi lenu libone ukuthi uSihle ubuya nani kulo mdlalo njengoba ahamba izinto zimbhedela. Enizokubona kuzonijabulisa kakhulu,” kubhala le ntokazi.
Ngesikhathi iveza lezi zindaba le ntokazi, abantu abaningi bakhombise ukujabula, bathi yize bengayithandi indawo eyilingisayo kodwa bajabule ngokubuya kwayo.
UKarabo Maroga weMzansi Magic ukuqinisekisile ukubuya kwale ntokazi kulo mdlalo.
“Ngeke sande ngamagama amaningi ngokubuya kwayo kodwa yona izobonakala kulo mdlalo maduzane,” kuchaza uKarabo.
Lo mdlalo ungeminye okushiye abalingisi abaningi kuwona okukhona kubo uMenzi Ngubane, Muzi Mthabela, Nomzamo Mbatha, Jessica Nkosi nabanye.
Ababhali bawo bathi kuzobonakala ubuso obusha kuwona njengoba kwethulwa umndeni omusha okukhona kuwo u-Enhle Mlotshwa, Hamilton Dlamini noTisetso Thoka.