LIZODONSELE amanzi ngomsele ibhungu elingumethuli wezinhlelo zakuYoutube osafufusa linameka izithombe zika-Unathi ezinkundleni zokuxhumana zihamba nombhalo othi “imali iyagezana”.
Lo mbhalo ka-Andile Simelane awehlanga kahle ku-Unathi kangangokuba uvele wawushutha (screenshot) wawunameka ekhasini lakhe ku-Instagram wazisa abalandeli bakhe ngalokhu kuhlukunyezwa.
“Ngicela ukunethulela u-@andilerh_simelane okunguye okhethe ukungihlukumeza ezinkundleni zokuxhumana namhlanje. Kusasa kungaba ngomunye umuntu kodwa namhlanje ukhethe ukuvuka angihlambalaze. Ngibone kungcono ngimnake ngoba ufuna ukunakwa,” kuloba u-Unathi.
Echaza ngesithombe esifakwe u-Andile uthe empeleni wayegula ngesikhathi sithathwa kodwa intatheli yacela ukushutha noma kunjalo.
Akuphelanga sikhathi esingakanani ngemuva kwalo mbhalo u-Andile wazixolisela wathi ubedlala.
“Ngiyaxolisa bengingakuqondile konke lokho Ma, ngiyaxolisa, bengidlala mina futhi ngimncane kabi ukuthi ngingalwisana nawe. Ngiyaxolisa Ma wami bengidlala,” usho kanje.
