Mamelodi Sundowns (3) 5
Sibanye Golden Stars (0) 2
XOLILE MPISANE
IMamelodi Sundowns izibekisele indawo kwiLast 16 yeNedbank Cup inqoba iSibanye Golden Stars ngo 5-2 eLoftus Versveld ngoMgqibelo ebusuku.
UTashreeq Matthews ushayele amaBrazilian amagoli amabili esiwombeni sokuqala,elinye laqhamuka kuMalibongwe Khoza, ngaphambi kokuthi u-Arthur Sales noKobamelo Kodisang bangeze amanye kwesesibili.
AweStars, womabili angene esiwombeni sesibili, avalelwe phakathi nguMojalefa Mokhatla, noBoeletsang Rankali
AmaSandawana asheshe ayibhakuzisa inethi ngomzuzu wesibili ngesikhathi uKhoza elibeka enethini ngekhanda kukandela ikhona ebishaywe nguMatthews.
Bekubukeka sengathi leli qembu lasePitoli lizozigwazela ibhece ngesikhathi lithola igoli lesibili ngomzuzu ka-15.
UKutlwano Letlhaku udedele ingcwenga yephasi wathola uMorris, ojike unozinti wabe eselivalela phakathi.
Unozinti weStars, uVelile Xankase, wenze isimo saba simbi kakhulu ngomzuzu ka-41 ngesikhathi epha uMatthews ibhola ebhokisini, walibeka enethini.
Nokho, iStars ibuye yadlala kangcono esiwombeni sesibili, yathola igoli layo lokuqala ngomzuzu ka-54 ngonyawo lukaMokhatla.
Lo mdlali uphinde waba uhlupho ezitobheni zamaBrazilian ngomzuzu ka-61 ngesikhathi eqala umnyakazo oqedelwe uRankali.
Amathuba eStars okulinganisa kulo mdlalo aphinde ehla ngesikhathi uSales eshayela iqembu likaMiguel Cardoso igoli lesine ngomzuzu ka-69.
ISundowns liphinde yaqeda umdlalo ingasaphelele ngenxa yokuthi uBathusi Aubaas ukhishwe ngekhadi elibomvu ngomzuzu ka-76, ejeziselwa ukushaya uMokhatla ngendololwane ibhola lingekho ngakubona.
Kuthe usuyophela umdlalo uKodisang washayelela isipikili sokugcina ngemuva kokuthola ibhola ezimele yedwa ebhokisini, iSundowns yaqhubeka nerekhodi layo lokungahlulwa ama-amesha kwiNedbank Cup.
Imiphumela yemidlalo yeNedbank Cup yangoMgqibelo
Lamontville Golden Arrows 1-2 Chippa United, Venda FC 1-3 Cape Town Spurs, Umvoti FC 0-3 Baroka FC, Lerumo Lions 0-2 Durban City, Mamelodi Sundowns 5-2 Sibanye Golden Stars