KUGQAME inzondo nenhlebo phakathi kukaLaConco, noThobile Mseleku ngesikhathi kugoqwa uhlelo iThe Real Housewives of Durban (RHOD).
Selokhu kuqale isizini yesibili bezinyundelana izintokazi kanti zitholane phezulu ngesikhathi zivulelana izifuba kwashoda ozogadla kuqala.
UThobile uthi ngesinye isikhathi uLaConco waqhamuka ezomanga kepha wethuka wathi “Akakaze ambone usathane onje emhlabeni”. Uthi akamqondisisi ukuthi angafike amzonde amhlebe kangaka kodwa uma esembona, bese eyamanga.
Ngesikhathi efika ohlelweni uThobile, wakubeka kwacaca uLaConco ukuthi ababona abangani futhi abasoze. Kuzokhumbuleka ukuthi bebengaqali ukuhlangana ohlelweni kanti uLaConco ungumngani nomnakwabo kaThobile, uNokukhanya uMaYeni Mseleku.
Ukuhleba ngoSorisha ngokufika ngendiza no-Annie, noJojo noThobile eMnambithi, ngezinye zezinto ezenze uThobile wabhoboka kwabonakala uhlangothi obelungaziwa ngaye. Ababukeli bechazekile bathi kade uThobile ezithobile bese kuyisikhathi sokuthi azilwele.
"UThobile uthukuse induku emqubeni ningamthathi kancane webantu. Umqondisile umedemu kaPetal," kusho Mini Palesa.
"Yebo, uNonku wabatshela emehlweni ukuthi vele sahleba owakuzwa Thobile kuyiqiniso," kusho u-Amanda.
UThobile usole uLaConco ngokuba ngumqambi manga oze awakholwa kwayena lawo manga.
Ekhuluma neSolezwe ngoMgqibelo uThobile uthe, yize kube khona ukungezwani noLaConco kodwa ujabulile ngokuba ohlelweni futhi kuningi akufundile.
ULaConco uthe akananxa noThobile kodwa ngesikhathi eqala ukumbona “kwakunebhuloho okwakusamele badlule kulona”. Uthe ngebhadi lokho akwangenzekanga. Uthe kodwa akananxa naye futhi akananzondo.