UMCULI, uNirvana Nokwe-Mseleku, ugqemeke udume lwengozi, etshelwa ukuthi ngeke esaba yingxenye yomdlalo okhuza ibuya kuSeason 2, i-Outlaws.
Lezi zindaba zidalulwe nguye uNirvana (27) ekhasini lakhe leFacebook. Kulo mdlalo uNirvana, oyindodakazi kaTu Nokwe waKwaMashu nomufi, uBheki Mseleku waseLamontville, ubelingisa indawo kaSihle Biyela ngo-2023.
Utshele abalandeli bakhe ukuthi uthole umyalezo obumazisa ukuthi ngeke esabuyela kwi-Outlaws.
"Ngifuna ukunibonga ngothando lwenu nokusiseka kulo mdlalo nendawo ebengiyidlala kaSihle."
UNirvana uthe kube yisibusiso ukusebenza nethimba elisezingeni njengaleli abebambisene nalo.
Uthe okumphathe kabuhlungu ngokuhamba kulo mdlalo ukuthi yiwona owaveza ikhono lakhe kuleli.
Uthe kube yinto enkulu kuye ukubamba iqhaza emdlalweni okuleli zinga futhi odingida udaba olujulile nobeluthinta izinhliziyo zabantu bakuleli.
"Ngiyaziqhenya ngokudlala le ndawo (Sihle)."
Uthe le ndawo kaSihle beyenza abantu abaningi bahambisane nayo.
"Lo mdlalo ungeminye mina nabanye bethu esiyithandile futhi kube yisibusiso ukuba yingxenye yabebebambe iqhaza. Ayiqhubeke indaba ye-Outlaws. Uyanithanda uSihle," kuphetha uNirvana ohlala eGoli kodwa okhulele KwaMashu naseLamontville.
Ungene emkhakheni wezokungcebeleka eneminyaka emine ngenxa yokuthi abazali bakhe bebengabaculi. Ubone eseneminyaka eyishumi ukuthi ubizelwe kulo mkhakha.
Uqeqeshwe yinkampani kanina, ugogo uPatty Nokwe no-Alfred Nokwe. UNirvana ubambe iqhaza kwi-Umoja Cultural Flying Carpet nakwiLos Spirido Del Pianetta e-Italy. Udadewabo kanina, uMarilyn Nokwe wodumo kwiMango Groove, uyena oqeqeshe kabanzi uNirvana futhi wamethula nakwezokukhangisa. Lokho kwenze uNivarna wagcina esesebenza noHugh Masekela, Shaluza Max noBusi Mhlongo.
Esezimele udume nge-EP esihloko sithi Cosmic Bae Trilogy III. Ubuye wasebenza noDJ Tefo engomeni ethi Emaweni, u-Okmalumkoolkat engomeni ethi Ushukela Etiyeni noKid X kwethi Father of Zen.Useke wanandisa kwiRoad To Afrochella.
UNirvana uselingise koRed Ink, Justice Served, Pretty's Daughter neGenerations The Legacy.
