KUCACE bha ukuthi kusenzima kubantu bakuleli ukwamukela izindaba zokudlula emhlabeni komrepha, uKiernan “AKA” Forbes (35), odutshulwe ngoLwesihlanu, eThekwini.
Lokhu kugqame kakhulu ngesikhathi umndeni wakhe ukhipha isitatimende esimemezela usuku lwenkonzo yesikhumbuzo neyomngcwabo.
Esitatimendeni umndeni uveze ukuthi inkonzo yesikhumbuzo ka-AKA izoba ngoLwesihlanu ngo-3 ntambama eSandton Convention Centre.
“Amathikithi okungena kule nkonzo azobe emancane kakhulu njengoba sizophinde sivule ithuba lokuthi abanye babukele inkonzo ezinkundleni zokuxhumana.Inkonzo yakhe yomngcwabo izoba ngoMgqibelo; le nkonzo izoba sesigabeni sesifundazwe izoba ngekhethekile njengoba izobe ingavulelekile emphakathini,” kusho isitatimende.
Umndeni ubonge kakhulu imilayezo abayithola kubantu abahlukene nekhombisa ukuthi u-AKA ubengathandwa yibona kuphela bewumndeni kodwa ubethandwa ngabantu abaningi kuleli nakwamanye amazwe.
Baphinde babonga umndeni wakwa-Mahosana, la kushadele khona uDJ Zinhle ongunina wengane ka-AKA, ngokubaxhasa kulesi sikhathi esinzima.
Bathe umyeni kaDJ Zinhle, uBongani, ngeke aze abe khona esikhumbuzweni sika-AKA kanjalo nasemngcwabeni wakhe ngenxa yokuthi ugcina usiko lwakhe.
Baveze ukuthi ubaba ka-AKA nguyena okhulumela umndeni futhi kukhona izimemezelo azozenza kwabezindaba.
Abalandeli baka-AKA baveze ukuthi abakholwa ukuthi kumenyezelwa izindaba ezifana nalezi ngaleli ciko.
U-@dillanoliphant uthe: “Angifuni ukukholwa ukuthi ngempela akasekho”.
U-@ReneilweMphilo uthe: “Yooo Hai, ngempela mina ngiyafuna abuye uKiernan”.
U-@BuhleTheFirst uthe: “Kungathi kuqanjwa amanga, yazi akukangeni kimi ukuthi akasekho. Yazi njengoba kumenyezelwa izinkonzo zakhe zombili ungathi bangangalifaka igama elithi AKA”.
Umndeni wakwaMotsoane, nawo olahlekelwe indodana yawo ebingumngani ka-AKA kulesi sigameko, uTibz, uveze ukuthi usuku lwakhe lokumfihla uzolumemezela maduzane kodwa luzoba ngempelasonto.
Kodwa bavezile ukuthi inkonzo yakhe yesikhumbuzo izoba ngoLwesine nezokhonjiswa ezinkundleni zokuxhumana ngo-5 ntambama.
Amathikithi enkonzo ka-AKA aphele ngemuva kwamahora amabili kumenyezelwe izindaba zokutholakala kwawo eWebticket.