ABALINGISI bomdlalo uShaka-Ilembe babonga bayanconcoza ngendlela lo mdlalo owamukeleke ngayo njengoba ngeSonto kukhonjiswe isiqephu sokuqala kuMzansi Magic ngo-8, ebusuku.
Lo mdlalo ushiye iningi libambe ongezansi ngendlela oyiyona, abanye baveza ukungenami ngezinto ezincane abazibonke kuwo ezingatheni, bathi bazoqhubeka bawubuke babone ukuthi kuzohamba kanjani njengoba uqhubeka.
Kusuka ngeSonto ebusuku lo mdlalo ubusesolimini lwabaningi ezinkundleni zokuxhumana bencoma abalingisi, indlela okugqokwa ngayo nendlela abalungiswe ngayo izinwele, indawo oqoshelwe kuyo, imizimba yabo nokunye.
Kuwona abalingisi okukhona kubo uNomzamo Mbatha, Wiseman Mncube, Sibonile Ngubane, Khabonina Qubeka, Thandeka Dawn King, Ziya Xulu, bangabanye abanconywe kakhulu kulesi siqephu ngekhono labo lokulingisa.
Ekhuluma neSolezwe uSenzo Radebe, olingisa indawo yeSilo uSenzangakhona, uveze ukuthi kusekuningi okuzojabulisa ababukeli balo mdlalo ukuya phambili.
“Basazomthanda umlingisi onguSenzangakhona, ikakhulukazi abantu besilisa abazithandelayo izintombi, angeke ngichaze okuningi okuzokwenzeka ukuya phambili kodwa ngingasho nje ukuthi kusayiwa kude, izinsizwa aziwubuke lo mdlalo,” kusho uSenzo.
Uthe isasasa elikhona manje kuyacaca ukuthi lisazoqhubeka.
“Namanje angikakholwa wukuthi ngithole indawo enkulu kangaka, kodwa kusho lukhulu kimi futhi umlando lo engeke ngize ngiwulibale emkhakheni wami wokulingisa,” kuchaza yena.
Kulo mdlalo amabele kaNoMzamo Mbatha abe undabamlonyeni njengoba bekubatshazwa indlela ayiyona ezinkundleni zokuxhumana.
Abaningi bayishayele izandla indlela yokugqamisa isiko lamaZulu, lokuthi izintombi nezinsizwa zazigqoka kanjani kudala.
Indawo kaZwide elingiswa, uWiseman Mncube nayo ngenye ekhulumise kakhulu njengoba abantu bebencoma indlela lo mlingisi azinikela ngayo uma enikwe indawo.
USlwane Mthimkhulu @Mtamerri uthe “Ngiwushayela izandla umdlalo uShaka-Ilembe ngithathekile ngizwa ukuthi kunabantu abafana noNhlanhla Mtaka noBuzetsheni Mdletshe abanesandla kuwo. Okwamanje ngiwunika-10/10”.
UPrescott South @south_prescott uthe: “Uma ngingathola intokazi enamabele afana nakaNomzamo, ngingayishada.”
ULordPiccolo @LordPiccoloSA uthe: “Ngilaleleni, umfowethu uWiseman Mncube uyilingisa ngendlela indawo kaZwide”.