KULINDELEKE ukuthi kugqame ubuso obusha obuningi emdlalweni Umkhokha njengoba namhlanje ukhuza ibuya kuMzansi Magic(161), ngo-8.30 ebusuku.
Isolezwe liqale lahosha ngemithombo ehlukene ukuthi abanye babalingisi abasha kulo mdlalo kubalwa uKini Shandu noSithelo Shozi.
Ngempelasonto uKini ekhasini lakhe kwiFacebook, ufake isithombe enomlingisi uSibonile Ngubane. Yize engabhalanga lutho oluthinta lo mdlalo kodwa izembatho akade bezifakile bezifana nse nezizobonakala kwisizini entsha yalo mdlalo.
“Baningi abalingisi nabazobonakala kulo mdlalonkakhuli abaKwaZulu-Natal, nabazoqhuba umdlalo uyephambili njengoba usuyitelenovela nje. Intsha eningi iwatholile amathuba ikakhulukazi le esuka emidlalweni emikhulu enjengoZalo, neMbewu njengoba iphela bebaningi abalingisi abathole ithuba lokubakuMkhokha,” kusho umthombo.
Uveze ukuthi uMbali Ngiba obonakala kuThe Real Housewives of Durban naye ungomunye wabalingisi balo mdlalo.
Ekhuluma neSolezwe emasontweni adlule, uMbali waveza ukuthi khona umdlalo azoba yingxenye yawo, futhi ujabule ngendawo ayitholile kuwo.
Isolezwe lipotshozelwe wumthombo walo ongashayi eceleni ukuthi uMbali uzodlala indawo kaZodwa, kulandela ukungabuyi kuka Linda Sokhulu.
“UMbali uvale isikhala sikaLinda Sokhulu sendawo kaZodwa. Amaciko amaningi azothola ithuba kulo mdlalo futhi adonswa nangendlebe ukuthi angalokothi akhulume ngokuba yingxenye yalo mdlalo njengoba kumele ethulwe ngokusemthethweni yisiteshi uMzansi Magic ukuze kube nesasasa,” kuchaza umthombo.
Isolezwe lizamile ukuxhumana noKini ngesithombe asifakile kodwa ucingo lwakhe belungangeni futhi lungemukeli nemiyalezo.
UPortia Hlongwane weMzansi Magic uthe bazothatha isikhathi bethula abalingisi balo mdlalo njengoba bengeke bakwazi ukubethula bonke ngesikhathi esisodwa.
Uthe banezinhlelo eziningi ngalo mdlalo ukuya phambili futhi bafuna ukwenza izinto ngendlela ezojabulisa abalandeli bawo.