KUTHUNGATHWA owokufika odabuka ePakistani ngecala lokubulala isisebenzi enkabeni yedolobha iVerulam ngoLwesine ebusuku.
Onogada benkampani iReaction Unit South Africa (RUSA) babizelwe emafulethini kuThompson Lane ngo-19:58 ngemibiko yokudutshulwa kwabantu.
“Sifike kule ndawo sathola owesilisa wasePakistani oneminyaka engu-24 ubudala enamanxeba amathathu okudutshulwa esifubeni. Ngeshwa ushonele khona lapho ngenxa yokulimala kabi. Kuthiwa umsolwa umnikazi wesitolo esikhanda amaselula emgwaqweni uWick futhi uhlala nezisebenzi zakhe ezimbili eziyizihlobo zakhe efulethini elingaphezu kwesitolo.”
Kuthiwa umsolwa ufike efulethini wadubula omunye wabasebenzi bakhe obemi ngaphandle, ngemuva kwalokho waphendukela kowesibili okwazile ukubaleka. Umsolwa ubaleke weba imoto yohlobo lweHyundai Sonata ebisemgwaqweni egcine itholakala e-Old Main Road, e-Ottawa.
Imbangela yokuhlaselwa kwakhe laba bantu ayikaziwa kodwa amaphoyisa ayaphenya.