Polokwane City (0) 0
Orlando Pirates (0) 1
I-Orlando Pirates izisondeze eqenjini eliqhwakele kwiBetway Premiership, iMamelodi Sundowns, ithela phansi iPolokwane City ngo 1-0 e-Old Peter Mokaba Stadium, ePolokwane, ngoMgqibelo ntambama.
UNkosinathi Sibisi uphinde waba yiqhawe, njengoba enza bebhekene neChippa United ngenyanga edlule, eshayela ezikaMagebhula igoli ezinqobe ngalo lo mdlalo esiwombeni sesibili.
Ukuthatha amaphuzu ephelele kushiye ezikaMagebhula endaweni yesibili ngamaphuzu angu-46 emidlalweni engu-20.
Isisele ngamaphuzu angu-12 kumaBrazilians, asedlale imidlalo emithathu ngaphezulu.
Kuyiwe ekhefini zibambene ngo 0-0 ngemva kokuthi uSipho Chaine ekwazile ukuvimba amabhola yingozi abethunyelwe ngu-Oswin Appollis ekude.
Ngasohlangothini lwePirates bekubhoke kakhulu uRelebohile Mofokeng. Ishodi lakhe lokuqala livinjwe ngunozinti, uBrian Okoth, elesibili laphuma eceleni kancane kwepali.
Isiwombe sesibili besingahlukile kakhulu kwesokuqala, womabili amaqembu ehluleka ukuthola amaphasi amahle uma esefike phambili.
Kuze kwalamula i-freekick etholwe yiqembu likaJose Riveiro maphakathi nesiwombe, ngomzuzu ka-67.
UKabelo Dlamini uyithumele ebhokisini, u-Okoth walibamba waphinde walidedela ibhola, uSibisi walihlohla enethini ngonyawo.
Kweminye imidlalo yeBetway Premiership, iSuperSport United idlale ngokulingana ngo 1-1 neMarumo Gallants eDr Petrus Molemela Stadium, eBloemfontein.
Igoli laMatsatsantsa lishaywe nguBradley Grobler ngasekupheleni wesiwombe sokuqala, elokulinganisa leGallants laqhamuka kuMatome Mathiane maphakathi nesesibili.
ILamontville Golden Arrows ibambane ngo 0-0 neChippa United eMpumalanga Stadium, eHammarsdale.