OKE waba wuMiss South Africa noMiss Universe ngo-2019, uZozibini Tunzi, akakholwanga ehlonishwa kumaSouth African Traditional Music Achievement (Satma) Awards, eMbombela Stadium, eMpumalanga, ngoMgqibelo.
UZozibini (29) waseTsolo, e-Eastern Cape, unikwe umklomelo wakhe ngumsunguli wamaSatma, uDkt Dumisani Goba, phambi kwezinkumbi ebezihambele lo mcimbi obuqeda unyaka ka-17.
Echaza uGoba ngokubungaza uZozibini uthe uqhakambise imvunulo namagugu akwaXhosa emazweni angaphandle.
"Bengingakamboni kodwa ngiyazi ukuthi lapho ekhona ugqoke imvunulo yakwaXhosa. Usenze saziqhenya ngaye. Yingakho simhlonipha namhlanje."
Eziphendulela uZozibini uthe umangele ngoba ubengazitshelanga ukuthi uzohlonishwa.
"Akukholakali ukuthi umuntu omusha njengami abesesteji esinjengalesi. Ngiyafuna ukukhuluma isiXhosa kodwa angifuni ukubandlulula abanye. Bengingazi ukuthi ngizobungazwa namhlanje. Yingakho ngingazihlinzekanga ngenkulumo," kusho uZozibini obonakale egadwe yizigansonso zamadoda ngesikhathi ehamba enxanxatheleni yezitolo.
UZozibini uyintokazi yesithathu yaseNingizimu Afrika ukuhlwitha lesi sicoco kanti ungeyokuqala emnyama ukusiqhoqhobala.
UGoba ubuye wamemezela ukuthi lo mqhudelwano sewuzoba eKwaZulu-Natal kusukela ngonyaka ozayo kuze kube u-2025.
Kuqopheke umlando kulo nyaka njengoba bekuqala ukuthi umunxa weBest Traditional Music SABC Radio Presenter ungathathwa wumsakazi woMhlobo Wenene noma owoKhozi FM.
Uthathwe wumsakazi weMotsweding FM, uTom Perez, wakhala ngaphansi uBeekay Mchunu noGudlabatshakazi. Abaculi bakamaskandi basoPhongolo badle umhlanganiso. UDumakahle uthathe indondo yeBest Maskandi kwathi uGatsheni wahlwitha umklomelo weBest Song of The Year ngengoma ethi Emendweni.
UMjolisi uhlulwe wuMa'onas The Melodian kwiBest Upcoming Artist. Iqembu lesicathamiya lithuse abaningi liwina iBest Traditional Acapella neBest Mbhaqanga. ULunga Ngamle weZibonele FM uwine iBest Traditional Community Radio Presenter. UNomsa Mkhonza wahlabana ngeyeTraditional Outfit.
Umlingisi weDurban Gen, uNelisiwe Sibiya, ukhale ngaphansi kuZamamboe Mkhize kwiBest Traditional Social Media influencer.
IBest Praise Singer iwinwe wuVenda Boy kwathi iBest Reggae yathathwa yiBurning Fire. UMthobisi Mthalane uphumelele eyeBest African Jazz kwathi iDaniel Brothers yakhala yemuka neBest Afro Soul Song.
Abaculi ebebenandisa ngoLebo Sekgobela, Nomcebo Zikode, Nathi Mankayi, Cevuzile, Intaba YaseDubai, Jessica Mbangeni, Mdu Ntuli, Zama Khumalo nabanye.
Kubuye kwakhunjulwa uLucky Dube ngesifundo ebesethulwa nguSolwazi PLO Lumumba kwathi uCaiphus Semenya noLetta Mbulu bahlonishwa ngeLifetime Achievement Award.
Phakathi kwezicukuthwane kungabalwa umphathi weqembu lebhola iTS Galaxy, uTim Sukazi, umsakazi woKhozi FM, uTshatha Ngobe.