ABAHLELI bomcimbi beGcwalisa Spring Picnic sebeveze ukuthi amathikithi kulabo abangawathenganga azobe etholakala enkundleni iKings Park, kusuka ngo-10 ekuseni.
UMthokozisi Zuma osethimbeni elihlela umcimbi, uveze ukuthi manje sebebamemezele bonke abaculi abazoba yingxenye yalo mcimbi.
Uthe abokugcina ababamemezele kuleli sonto kukhona kubo uK.O, Oscar Mbo, Nkosazana Daughter noMorda.
“Sesiqalile simisa isiteji manje, sesilinde abantu abazohambela umcimbi wethu ngoMgqibelo. Uma sibheka nezulu lisivumile ngakho abazohambela umcimbi akukho okumele bakhathazeke ngakho. Sibophele abaculi esicabanga ukuthi bazothakaselwa abahambela lo mcimbi njengoba ungowesithathu kulo nyaka. Amathikithi njengoba sazi ukuthi abantu bazowafuna ubuthaphuthaphu namhlanje njengoba kuphela inyanga, bangawathenga eTicketpro (Spar) naseComputicket kodwa nasesangweni azobe ekhona, bangakhathazeki,” kuchaza uZuma.
Uthe kubaphathi bohlelo bakhethe ukufaka umsakazi woKhozi FM, uSelbyonce naye oseyingxenye yakade bekhona okukhona kubo uMashudula, Tshatha, Bingelela Mpanza nabanye.
Kubaculi bakamaskandi abazonandisa kukhona Izingane Zoma, Imithente,Thandeka Hadebe, Mjolisi, Khuzani, Dumi Mkokstad, Qwabe Twins, DJ Tira, Sminofu, Skweletu , Gatsheni, Umafikizolo, Menzi nabanye.
Amathikithi alo mcimbi kukhona aka-R250 no-R1500 i-VIP.