UMNDENI wesilomo sakuleli esidlule ngokuzuma emhlabeni ngemuva kokudutshulwa eThekwini, uKiernan “AKA” Forbes, sesiveze ukuthi izophuma i-albhamu yakhe naye abesememezele ukuthi izophuma ngoLwesihlanu oluzayo.
U-AKA ozongcwatshwa ngoMgqibelo, umndeni wakhe uthe le albhamu ethi Mass Country, bazoyikhipha ngenjongo yokuhlonipha lo mrepha nokujabulela impilo yakhe.
Esitatimendeni esikhishwe abakaSony, la abeqopha khona u-AKA, baveze ukuthi lo mrepha wayehlele ukuthi lealbhamu iphume ngenyanga edlule kodwa kwangenzeka.
UNivo onguphrojusa wale albhamu, uthe bazizwa bebusisekile ukusebenza eduzane no-AKA kule albhamu.
“Sichithe isikhathi esiningi sicabanga,senza izinto ezihlukene ukuze iphume iyilento ebesifuna ibe iyona. UKiernan usebenze kanzima ezinikele naye kakhulu kuyona. Ubezinikele ngenhliziyo yakhe yonke futhi sizizwa sibusisekile ukuthi ulitholile ithuba lokuqinisekisa ezinye izinto kuyona yonke. Ngakho okuzobe kuzwakala futhi kubonakala kuyo okuningi uzenzele yena kuzobe kubonakala ngendlela akade efuna ngayo,” kusho uNivo.
USean Watson wakaSony uthe baphukelwe izinhliziyo ngokushona kuka-AKA, nobekungelinye lamaciko abo azimisele.
“Izinhliziyo zethu zinomndeni wakhe kulesi sikhathi esinzima kangaka. Siwumndeni wakaSony Music sidlulisela amazwi enduduzo emndenini kanye nabo bonke abalandeli bakhe,” kushouSean.
Uthe njengesifiso sika-AKA, ingoma yakhe ethi Company apike kuyo uKiddominant, nayo izophuma namhlanje nabayiqopha eLos Angeles, ngesikhathi samaholidi ngoJanuwari.
Inkonzo yesikhumbuzo ka-AKA izoba namhlanje ngo-3 ntambama eSandton Convention Centre.Ekamngani wakhe adutshulwa kanye naye uTebello “Tibz” Motsoane ibibanjwe eSacred Heart College e-Observatory, eGoli, izolo.
UTibz okhulele eKurhuleni unconywe abaningi abebehambele inkonzo ngokuhlela imicimbi emikhulukazi kuleli kubalwa nowakhe owaduma kakhulu iPop Bottles. Akazange agcine lapho ushona nje ubese engene wagxila kwezokupheka namawayini.