INDODAKAZI yowayengumengameli uJacob Zuma, uGugu uthi isasasa lomculo kamaskandi okubonakala kuyiwo okhuluma nentsha kulezi zinsuku, yikhona okuzale umdlalo Amalanga Awafani.
Lo mdlalo uzoqala ngo-Ephreli 28 ngo-6.30 ntambama ngoMsombuluko kuya ngoLwesihlanu.
UGugu uthe okunye wukuthi ngesikhathi ephuma ekhaya eyofundela umsebenzi wokubhala imidlalo, lokhu wakwenza enomcabango wokuthi imidlalo ezokwenziwa nguye izoqoshelwa KwaZulu-Natal.
UGugu ukhulume neSolezwe ngesikhathi kunomcimbi wokwethula lo mdlalo Amalanga Awafani owethulwe KwaDukuza, ngesonto eledlule.
Ekhuluma neSolezwe uGugu uveze ukuthi njengenkampani iStained Glass TV, akekho ongabaphikisa ukuthi ukuqopha imidlalo kulesi sifundazwe kwenze bavumbulula ithalente ebelingaziwa baphinde babhala imidlalo ekhuluma entsha.
“Kulezi nsuku intsha nomaskandi izinto ongeke uzihlukanise, kanjalo nempilo yamabhinca iyona okubukeka ithathe amehlo abaningi. Sivele sakhetha ukwenza umdlalo ozokhuluma nentsha njengoba ubheka impilo yamawele uThembi (Nsikelelo Mthethwa) noSabelo (Fanele Zulu), abasemkhakheni womculo kamaskandi ababhekana nezingqinamba ezihlukene kungakho umdlalo uthi Amalanga Awafani. Okunye-ke mina ngiphuma ngiyofundela ukuba kulo mkhakha, ngazitshela ukuthi uma ngiqeda ngibuyela ekhaya ngiyokwenza khona imidlalo ukuze ngiqhubeke nokuxoxa ngezinto ezenzeka eKZN, okunye futhi ukuthi siyisizwe esinethalente elimangalisayo, hhayi nje la KwaZulu-Natal kuphela kodwa kuzona zonke izifundazwe la usithola khona,” kuchaza uGugu.
Uveze ukuthi intsha kukhona isifundo ezosithola kulo mdlalo, ngakho uyanxusa ukuthi iwubheke.
Uthe kuwona bakhethe nanokusebenzisa umculi kamaskandi uMthandeni "Igcokama Elisha" Manqele kwezinye iziqephu zabo ukuze umdlalo ukhulume into eyiyo nababukeli bawo.
ULala Tuku wakwaSABC uthe uthemba ukuthi umdlalo walolu hlobo uzokwenza ezibukwayo njengoba belindele izibalo zabo ukuthi zikhule.
“Ngiyathemba ukuthi njengeSABC ngalo mdlalo sobuyela ezingeni esasaziwa ngalo lokukhiqiza imidlalo ebukwa izinkumbi zabantu. Ngawo futhi sikhethe ukuwubuyisele ku-6.30, ngoba sifuna ukuthi abantu baqale ukubuka thina kusuka ngalesi sikhathi kuze kube u-10 ebusuku,” kuchaza yena.
Isolezwe like lathola ukuthi umdlalo iSkeem Saam uyaphela futhi isikhala sawo sizovalwa ilona omusha.
Kodwa ngesikhathii usuthulwa kushintshile ukukhuluma.
Abalingisi okulindeleke ukuthi babonakale kulo mdlalo kukhona kubo uMelusi Yeni noSthandwa Nzuza abazolingisa indawo ephambili nabo.
Abanye, kubalwa uSandile Mdletshe, Nompumelelo Ndlovu, Cabangile Gumede, Brian Khumalo, Sphelele Phili, Kholeka Mthembu, Sbonakaliso Mazibuko noMduduzi Nombela.