UMLINGISI obedlala indawo yomhlengikazi onguSne Mtshali kwiDurban Gen, uNombulelo Mhlongo, ungomunye wabalingisi bamazwe ngamazwe abaqokwe emiklomelweni womhlaba amaScream Awards 2024.
UNombulelo (31) wasoPhongolo, ukwiTop 10 emunxeni weYouth Actress of the Year, lapho edlana khona imilala noTimini Egbuson, uMercy Eke, uLydde Coco, uTirie OY, uTekunbi, uKayade Ojuakope baseNigeria kanye noYolanda waseNingizimu Afrika.
UNombulelo unxuse abantu bakuleli ukuba bameseke ngobuningi babo ukuze agcine edle umhlanganiso.
"Badinga nje imali encane ukungivotela. Ungena kwi-link bese uqonda kuYouth Actress of the Year. Ufica uNombulelo Mhlongo bese ukhetha inani lamavoti ofuna ukuwafaka."
Lo mqhudelwano uvamise ukubanjelwa eLos Angeles, e-USA futhi usakazwa bukhoma kwiSpike TV.
Ngemininingwane ethe thuthu ngokuvota nangosuku lokuvala, abantu bengangena kule-website: elfrique.com/vote/title/scream-all-youth-awards-2024
Uma uNombulelo egcina ngokuphumelela, kuzobe kungekhona okokuqala ehlabana emqhudelwaneni osezingeni lomhlaba.
Nyakenye wakhala wemuka nendondo yeBest Supporting Actress: Southern/Eastern Africa neBest Actress: Africa kumaZikomo Africa Awards eLusaka, eZambia. UNombulelo wayeqokwe eminxeni emine okubalwa owe-Inspirational Woman of the Year noweBest Supporting Actress kodwa wakhala ngaphansi kuyo.
KwiBest Actress: Africa, uNombulelo waqumba phansi uNgele Ramulondi, Thando Thabethe, Ziya Zulu, Gista Warsuki, Noele Ramulondi baseNingizimu Afrika nabanye bakwamanye amazwe kanti kwi-Best Supporting Actress: Southern/Eastern Africa, wahlula uThabsile Zikhali, Ama Qamata, Rosemary Zimu, Ngele Ramulondi nabanye bakwamanye amazwe.
AbamaZikomo Africa Awards bathi okwawinisa uNombulelo ukuzimisela nokusebenza ngokuzikhandla ekuthuthukiseni ikhono lakhe lokulingisa. UNombulelo uqale ukuduma kuleli ngokudlala indawo kaNomcebo kuZalo emuva kokudlala ekaCassandra Masemola kwiSkeem Saam. Wafundela ukulingisa esikhungweni saseLos Angeles, e-USA ngo-2010.