KUPHELILE ukuqagela ngomdlalo wethelevishini owuchungechunge ozovala isikhala esavuleka ngokuqedwa kukaNikiwe, kwi-e.tv. NgoMsombuluko ebusuku abe-e.tv badlale isikhangiso esibikezela ngomdlalo omusha ozokhonjiswa yisiteshi esizimele ngo-6.30 ebusuku, kusukela ngo-Ephreli nonyaka.
Phakathi kwabadlali ababoshelwe emdlalweni omusha othi Isiphetho Destiny kubalwa abalingisi asebezakhele igama njengoGugu Gumede obenguMaMlambo kuZalo, uThulani Mtsweni obenguBongani kwiGomora, uMbalenhle Mavimbela obenguHlomu kwiThe Wife, uLinda Sokhulu ongumphenyi kwiKiller Front Page, umculi uNokwazi Dlamini, usomahlaya uPastor Mjosty, uKwenzo Ngcobo obenguQhawe kwiThe Wife, ingwazi yomsakazi uTreasure Tshabalala, uThabiso Rammutsi noKop Makgae.
Ngesikhathi bezwa ngeSiphetho Destiny, kube nesasasa kwaze kwakhona abalimisa ngembaba elokuthi bawulindele ngamehlo abomvu umdlalo.
Isiphetho Destiny singene esikhathini osekuke kwagidagida khona imidlalo eminingi enjengeBackstage, Durban Gen neminye.