UZOQALA ukubonakala ekupheleni kukaJulayi uma sekuqala isizini yesibili yomdlalo iThe Queen, uZandile Msutwana olingisa indawo kaVuyiswa kulo mdlalo.
UZandile ubethathe ikhefu ngemuva kokuvela kwezindaba zokuthi walimala ngaphakathi esebenza kuwo. Isitatimende esakhishwa abeFerguson Films saveza ukuthi uZandile ulimale waphuka, ngenkathi beqopha.
Lokhu kwaphoqa ukuthi athathe ikhefu lesikhashana isikhala sakhe savalwa nguThembisa Mdoda. Kuleli sonto uZandile ukhiphe isitatimende lapho eveze ukuthi useluleme.
“Ngiyabonga kuwona wonke umuntu obengithumelela imiyalezo, befona benza konke ukubheka isimo sami sempilo njengoba bengingaphilile. Manje sengingumqemane futhi sengibuyelile nasemsebenzini ukuyoqopha iziqephu zeThe Queen,“ kusho uZandile.
Ukuveza kwakhe lezi zindaba kujabulise abalandeli bakhe ngoba kwaba khona ukukhala kwabaningi ngesikhathi kuvela uThembisa kulo mdlalo, abantu bethi abamuzwa kahle.
UKabelo Chabalala weMzansi Magic ukuqinisekisile ukuthi uZandile usebuyile futhi useqalile ukuqopha.
“Isizini ekhonjiswayo manje iyaphela ekupheleni kukaJulayi, kuzothi uma kuqala entsha uzobe esekhona uZandile. Kuningi okujabulisayo okuzobonakala kwisizini entsha yesithupha. Ababukeli abalinde ngoba kukhona nabalingisi abasha abazobonakala kuyona,“ kuchaza uKabelo.
Muva nje, ababukeli basanda kujabulela ukubuya kukaSello Maake ka-Ncube, olingisa indawo kaKgosi kulo mdlalo.