UMCULI we-Afro pop, uHlobisile ‘Qhawelentombi’ Mkhize, ubonga uNkulunkulu ngokuthi agcine elingisa emdlalweni, Uzalo.
UQhawelentombi (32) wasesigodini saKwamageza, eMolweni, uthe ukudlala indawo kaNokuzola (Shamanikazi) emdlalweni wethelevishini osakazwa kwiSABC 1, phakathi nezinsuku ngo-8.30 ebusuku.
"Ukudlala kuZalo bekuhlale kuyinto engifisayo ngenhliziyo yami yonke ukuba womunye wamaciko odlala kulo. Ngendlela ebekuyisifiso ngayo, bengibona kuyiphupho nje.
“Ngizamile, ngagcina ngiba nenhlanhla yokuthi ngithole ukudlala indawo kaNokuzola, iShamanikazi. Uhamba noMbatha, uShaman obuye abukeke njengomfundisi wamanga."
UQhawelentombi uchaze uNokuzola njengentokazi esanda kubonana noMbatha futhi ufisa ithuba lokuba ngumlandeli wakhe.
"Uyintokazi ezothile futhi efisayo ukwenza kahle empilweni, ngethemba lokuthi uMbatha angaba wusizo uma ezisondeza kuyena."
Uthe abantu abalindele ukubona elinye ikhono lakhe elingajwayelekile ngoba uvamise ukulingisa emidlalweni yeshashalazi abuye acule.
"Manje ngithole ithuba kwithelevishini. Kuzonginika ithuba lokuveza okunye ukucikoza kwami, abantu abangakaze bathole ithuba lokukubona."
Uqhube wathi leli thuba alitholile limkhumbuze ukuthi ukubekezela kuzala impumelelo kanjalo nokuhlonipha indima yezokulingisa.
"Ngikujabulele nokulingisa namaciko asemnkantshubomvu kulo mdlalo. Ngifunde okuningi kuwona."
Ngaphandle kokulingisa, uQhawelentombi ubuye wasebenza nomrepha uDuncan kwi-albhamu entsha ethi Incwadi Yezono, nakwi-EP kaQhawelentombi ezophuma ngonyaka ozayo ethi, Umakhelwane.
Kulezi zinsuku ushisa izikhotha ngenoni elisanda kuphuma phambili kwiGagasi FM, elithi Inhliziyo, asebenze kulo noJustin Case, noCosta Dolla.
UQhawelentombi ubuye asebenze noDkt Gcina Mhlophe ngaphansi kwenhlangano iGcinamasiko, lapho befundisa izingane ngemvelaphi yazo nokugqugquzela isiko lokufunda nokubhala ebanwtini abasha.
Imfundo yakhe uyithole ezikoleni ezehlukene eBazamile Primary, eGreyville Primary, nasePhambili High eRossburgh. Ukulingisa ukufunde eWushwini Art Centre, ngaphansi kweso likaJerry Pooe.