KUZOQHUDELANA osaziwayo abake babonakala ohlelweni iTropica Island of Treasure njengoba sekumenyezelwe izindaba zokubuya kwalolu hlelo.
Ngesikhathi kumenyezelwa ukubuya kwesizini yeshumi kube sekuvela ukuthi kule sizini umethuli omusha kuzoba wu-Anga Makubalo.
U-Anga obuye abe wumculi futhi ungumlingisi, akayena umafikizolo kulolu hlelo njengoba ake wadla umhlanganiso kwisizini yesikhombisa eyayiseSeychelles, ngokubambisana noBonginkosi Ndima.
Lolu hlelo belwethulwa wuKatlego Maboe, belukhonjiswa kwiSABC 3 okuyisiteshi esesaziwa ngeS3.
Ekhuluma ngokwethula uhlelo u-Anga, uthe usekubheke ngabomvu ukuthi abantu balubone uhlelo futhi asekujahe kakhulu wukuthi alwethule.
“Okungijabulisa kakhulu wukuthi lena kuzoba yisizini enkulu njengoba izobuyisa iningi labantu abake babonakala kulona. Kumasizini adlule lube nabethuli abamangalisayo, nami ngiyajabula ukungena ohlwini lwabo njengoba lugubha isizini yeshumi lwaba khona. Esengikubheke ngamehlo abomvu wukubona bonke abake baba yingxenye yalo bebuya bezozama inhlanhla futhi,” kusho u-Anga.
Uthe osaziwayo kuzobuya ngabake baba yingxenye yalo bese kuba yintsha ezobe ibonakala okokuqala ohlelweni.
UMiantha Roux, wezokukhangisa kwaClover, okuyibona abaxhase lolu hlelo uveze ukuthi ekuhambeni kwesikhathi bazomemezela ukuthi luzoqala nini.