EZINYE iziteshi zayivala indaba yokuthi kusakazwe amahora angu-24 ngosuku.
Esikhaleni salokho zenza okubizwa nge-automation okuthi mhlawumbe kusuka ngo-12 ebusuku kuya ku-6 ekuseni, kungabi namsakazi kuzidlalele nje umculo kuphela.
Kungenxa yemizamo yokufuna ukonga imali ngoba esikhathini esiningi abakhangisi bayagqoza ebusuku ngakho lezo zinhlelo azingenisi mali. Kunalokho iyaphuma kuphela ngoba isiteshi kumele siholele umsakazi.
Ezinye nokho ziba nabasakazi kuze kuse. Ngikhumbula uDJ Sonic kwiGagasi FM esangena ebusuku wayeze abe nesiqubulo esithi “#iradioimnandiebusuku”.
Kwakuyimizamo yakhe yokuthi abantu baqhubeke nokulalela bengagcini nje kuphela ngezinhlelo zasemini. Kubukeka kwamsebenzela ngoba nakho abaphathi beGagasi bawabonile amagalelo akhe bamfaka emini phakathi nesonto noFlymotion.
Kunomsakazi weMetro FM ongena entathakusa okuthiwa wuMpumi “Msakazi” Mlambo.
UMsakazi, ongena ngo-2 kuya ku-4 ekuseni phakathi nesonto nohlelo iHustlers Fix, uke waba kwiPower FM yaseGoli. Kulezi zinsuku ubanjelwe wuNthabeleng “Mat Elle” Matele.
Indlela eza ngayo ngiyabona ukuthi uyangqongqoza ezinhlelweni zasemini mhlawumbe ayobambisana nabanye.
Umuntu ogcina icala nje uyezwakala kodwa yena indlela asakaza ngayo uyazimisela unomfutho ofunekayo akukhona nje ukuthi uyakushushuzela ulale ngoba nakhu esebusuku.
Okungichazayo wukuthi uze alande nezimenywa zikhulume ngezihloko ezihlukene futhi ezifundisayo. Unokulanda abafundisa ngemali njengoTshepo Kgapane okhipha izeluleko.
Ngicabanga ukuthi lokhu kuwumqondo omuhle ngoba akuyena wonke umuntu onethuba lokulalela umsakazo emini. Ababhekile abangagcini ngokuzwa nje umculo nezihloko ezingathi shu njengokubuzwa ukuthi “uzokwenzani ekuseni”.
Okunye okungichazayo futhi wukuthi namakhasi ezinkundla zokuxhumana asuke esebenza. Uma ubheka awezinye iziteshi, sigcina emini ukubona kukhona okubhalwe kuwo kuba sengathi ezinye izinhlelo azibi khona.
Kuyaziwa manje ukuthi izinkundla zokuxhumana nemisakazo kuyasebenzisana. Akungalali akusebenze zikhathi zonke.
Ungangibhalela [email protected], kuTwitter @fanelebengu noma kuFacebook Fanele Bengu