UVUKWE umunyu, wahlengezela izinyembezi owazakhela ugazi ngokusakaza umdlalo webhola ngeqophelo eliphezulu kuKhozi FM (kuseyiRadio Zulu), uDkt Ephraim Ronnie Masilela ngesikhathi ebuzwa ngoyise ngumsakazi weRadio 2000, uDavid Mashabela.
UMasilela uthe njalo kubanzima uma ebuzwa ngoyise ngoba unina waze wadlula emhlabeni engamtshelanga ukuthi ngubani. Kuze kwaphoqeleka ukuba ashaye ithamu lamanzi enkomishini ukuze aphendule lowo mbuzo.
Uthe igama elithi "baba" akakaze walikhuluma ngoba akamazi uyise. "Okubuhlungu kakhulu ukuthi anginaso ngisho isithombe sakhe.“
"Uma ngilalela ingoma kaRebecca Malope ethi My Mother Was A Kitchen Girl, My Father Was A Garden Boy, inhliziyo yami iba buhlungu ngoba umama wayesebenza emakhishini impilo yakhe yonke."
Uthe kungcono kuRebecca ngoba wayazi ukuthi uyise wakhe wayesebenza engadini, kunaye ongazi nokuthi wayengumhlobo muni.
"Ngizamile sengimdala ukumbuza umama ukuthi kwakungubani ubaba kodwa wayehlale eshintsha ebusweni uma ngimbuza lowo mbuzo. Sengikhulile ngokwanele ngabona ukuthi ngoba angazi kwenzekani phakathi kwalaba bantu, angivele ngikuyeke ukubuza umama ngobaba. Umama waze wadlula emhlabeni ngo-1993, engakaze wangitshela ngobaba. Ngiyabonga kuNkulunkulu ngoba umkhulu uyidlalile indima yokuba wubaba."
Nakuba kunjalo, uMasilela uthe isikhala sikayise sivelile ngokuhamba kwesikhathi ngoba kunezingane ezazihlale zimgcona, zimbuza ukuthi uyise ziyombona nini?
Uthe empeleni unina wayekhuluma isiSuthu sasenyakatho, umkhulu wayekhuluma nabo ngesiZulu nangesiNdebele ekubeni ukhulu wakhe wayexhumana nabo ngesiBhunu njengoba ayeyiKhaladi.
"Ngibiza uMasilela ngoba umkhulu wakomalume ungumNdebele. Uma abantu bengibuza ukuthi mina ngumhlobo muni, ngike ngithi ngiwumuntu waseNingizimu Afrika."
Uthe uma ezwa ingoma kaRebecca wayeke akufise ukuthi uyise naye wayesebenza engadini ngoba kubo babedla imbuya ngothi.
UMasilela uthe bahlupheka ngale ndlela yokuthi babebanga amanzi esiphethu nezimbongolo.
Eqhuba, uMasilela uthe nasesikoleni wahlukumezeka kakhulu ngoba kunabafana ababemhlupha, bemfuna ngenkani amakhekhe ayebhakwa futhi edayiswa ngunina ngenhloso yokuxosha ikati eziko kubo.
Uthe wayesencamela ukugula ngoba kwakumphumuza ekuhlukumezweni ngamabhoklolo. UMasilela wazakhela udumo ngokusakaza imidlalo yebhola, ikakhulukazi eyayiba phakathi kweKaizer Chiefs ne-Orlando Pirates ngaphambi kokufundela ubudokotela eMedunsa.
