UMNDENI kaZanele Mbokazi ujabule ngokuqhubeka nokuhola ukuxhaswa ngoba ngoLwesithathu kuzomenyezelwa abaculi abazohlonishwa ngezindondo emcimbini walo nyaka wamaSABC Crown Gospel Music Awards.
Abaqokiwe bazomenyezelwa eMidrand, eGauteng, bese kuthi umcimbi omkhulu uba ngoNovemba 24, eGallagher Estate.
USiyanda Mwandla osethimbeni elihlela umcimbi, uthe kulo nyaka sebethathe isinqumo sokuthi bahloniphe umsunguli womcimbi, uZanele.
“NgoLwesithathu emini kuzoba nemicimbi emibili Iziko National Gospel Music Conference, lapho abaculi namanye amaciko asemculweni besuke befunda ngezinto eziningi futhi kukhona ababacebisa ezintweni ezihlukene abazenzayo. Kuyothi ebusuku bese kuba umcimbi wokumemezela abaqokiwe. Sinxusa ukuthi amaciko awuhambele umcimbi ikakhulukazi labo abafake izicelo zokuqokwa emcimbini walo nyaka ngoba kukhona okumele bakwazi ukuya phambili ngendima abakuyo nokunye.
“Kulo nyaka esifuna ukumemezela futhi ukuthi sizohlonipha umsunguli womcimbi uZanele ngendlela engakaze ibonakale. Sinxusa abantu abazobe bengeyona ingxenye yomcimbi ukuthi babheke emakhasini ethu ezinkundleni zokuxhumana okuzobe kwenzeka,” kusho uSiyanda.
Uqhube wathi amathikithi asekhona bayanxusa ukuthi abantu bawathole kungaze kube umzuzu wokugcina.
Usonge ngokuthi okunye okuthinta umcimbi omkhulu bazokumemezela ekuhambeni kwesikhathi ngoba kuningi abakuhlelile ukuhlonipha uZanele.