USIYABONGA “Bhele” Nomvethe owayengumgadli weKaizer Chiefs, akaliboni okwamanje iqembu elikulungele ukuqeda ukukhonya kweMamelodi Sundowns eMzansi.
ISundowns osekuqinisekisiwe ukuthi isiyiwinile iDStv Premiership ka-2023/2-24, ibukeka ingenantanga ebholeni laseNingizimu Afrika. Isethubeni lokuqopha umlando wokuba yiqembu lokuqala kwiPremier Soccer League elizoqeda isizini lingayazi induku.
Impumelelo yeSundowns isifake ingcindezi emaqenjini aseSoweto okuyiChiefs ne-Orlando Pirates abezicanasela, ewina izindebe eminyakeni edlule.
Ngaphandle kokuyenza eyayo iligi eMzansi, iSundowns isizakhele isithunzi nasebholeni lase-Afrika. Kule sizini, iwine indebe ye-African Football League (AFL) ebidlalelwa okokuqala.
UNomvethe, owadlalela iChiefs, Pirates neBafana Bafana, uthe kufanele zibhukule izinkunzi zaseSoweto.
“Kufanele bathole abadlali abasezingeni eliphezulu abazokwenza umsebenzi wabo ngoba iningi labadlali babo sinokubabona bedlala kahle izinyanga eziyisihlanu kuya kweziyisithupha, silindele ukuthi kukhulu esizokubona, sizombona eqenjini lesizwe kodwa kugcina kuba nezinto ezenzekayo ebafaneni ukuthi manje wenza izinto ezingalungile,” kusho uNomvethe.
“Iqembu elinjengeSundowns selithole kakhulu ukuzethemba ngoba lidlala ngisho kwiChampions League. Iqembu elinjalo liphezulu kakhulu. Angiboni ukuthi kukhona umuntu ongalivimba kuze kube namanye amaqembu angemuva kwayo asebenza ngokuzikhandla, alethe abadlali abasezingeni eliphezulu abazoshaya umsebenzi ngoba uma uthi uyabheka ibhola lamanje seliyibhizinisi. Akusemayelana nebhola kuphela kodwa seliwumsebenzi,” kusho uNomvethe.
UNomvethe, osaphethe irekhodi lokushaya amagoli amaningi kunabo bonke abadlali emlandweni wePremier Soccer League (123), ungumgadli wokugcina waseMzansi owashaya angu-20 emidlalweni yeligi ngesizini.
Lokhu wakwenza ewina umklomelo weLesley Manyathela Golden Boot edlalela iSwallows ngesizini ka-2011/2012.
Kuleyo sizini wadla nomklomelo wePSL Footballer of The Season, Absa Premiership Player of The Season nePlayers’ Player of The Season.
Kubadlali baseMzansi abaphambili embangweni womklomelo wamagoli nokufinyelela kwangu-20 kukhona uTshegofatso Mabasa wePirates (15) no-Igraam Rayners weStellenbosch (14).
“Ngiyaphoxeka uma abagadli behluleka ukushaya amagoli. Akukhona ukuthi nakhona bayathanda ukwenza ngendlela abenza ngayo. Yizinga labadlali bethu basemuva, basebenza kanzima ngoba nabo uma kuwukuthi uyazidlulela nje ushaya amagoli kalula sizokubheka. Kubalulekile ukuthi nawe uzimisele ukuthi uma bengalishayi igoli phambili, nawe vimba ngemuva. Nakhona sekuwukuthi wena mgadli ufunani ngempilo yakho. Kufanele usebenze ngokuphindiwe ukuze uyizuze le nto oyifunayo,” kusho uNomvethe.