UKUMEMEZELA kweKaizer Chiefs umdlali omusha wangaphandle kukhomba ukuthi kungenzeka kubekhona abagawulwa yizembe njengoba sesidlulile kwesamukelekile isibalo sabokuhamba abavunyelwe emaqenjini.
Imigomo yePremier Soccer League (PSL) ithi amaqembu avunyelwe ukusayinisa abadlali abahlanu bangaphandle. Ngokumemezela uJames Agyekum Kotei odabuka eGhana izolo, isibalo sabangaphandle sesifinyelele kwabayisithupha kwiChiefs.
UWillard Katsande noKhama Billiat banamaphepha abanikeza ubuzwe bakuleli.
UKotei (25) ongumdlali wasesiswini ungowesibili iChiefs esimethulile njengoba amaqembu elungiselela isizini entsha. Leli qembu elingeke lidlale kwiMTN 8 kwisizini entsha kulandela ukuqeda ngaphandle kweTop 8, lethule uLazalous Kambole waseZambia.
“IChiefs isisayinise uJames Agyekum Kotei inkontileka yeminyaka emithathu. Usuka kwiSimba Sport Club edlala kwiTanzanian Premier League,” kusho isitatimende saMakhosi.
Abanye abadlali bangaphandle abakwiChiefs, uLeonardo Castro okuke kwabikwa ukuthi ufakwe ohlwini lwabangase badedelwe, uTeenage Hadede, Daniel Akpeyi, noDax Adrianarimanana.
IChiefs ayimandla ekumemezeleni abadlali abasha kodwa isihlukane nabayisishiyagalombili. Yize ingashongo ukuthi izogawula kwabakuleli noma kwabangaphandle kodwa ithe lisazokhala izembe.
“Ziyaqhubeka izingxoxo zokudedela abanye abadlali ababili noma ngaphezulu,” kuqhuba iChiefs kwi-website yayo.
Abadlali asebekhonjwe abafika ngayo, uHendrick Ekstein, Bhongolethu Jayiya, Ryan Moon, Virgil Vries, Gustavo Páez, Khotso Malope, Emmanuel Letlotlo noBrylon Petersen.
UKotei uqale ukudlala ibhola ngakubo egijima kwiLiberty Professionals FC. Kuvela ukuthi indlela ayesibamba siqine ngayo isisu waze wateketiswa ngokuthi * -James Lampard.
Ushiye eGhana ngo-2015 wayodlala e-Oman e-Asia. Ufike kwiSimba ngo-2016 lapho ebe nemidlalo ewu-60. Ubekhona ngesikhathi leli qembu liyibamba kwiCaf Confederation Cup yanonyaka.
Ukufika kwakhe kwiChiefs kusho ukuthi uzoshubisa umbango kuWillard Katsande, George Maluleke, noDax.
IChiefs imemezela uKotei khona izolo kuvele ukuthi iphunyukwe uGabadinho Mhango owethulwe yizimbangi i-Orlando Pirates. Belivela igama laMakhosi emaqenjini abegaqele lo mdlali obekwiBidvest Wits. Iqembu ebelimfuna bekumele likhiphe imali kwazise iZitshudeni bese zilisebenzisile ilungelo lazo lokulula inkontileka yakhe ngonyaka.
Omunye umdlali okuvela ukuthi ufunwa yiChiefs uMwape Musonda obengumgadli ovelele ngesizini edlule. Lo mgadli akazange abonakale eqenjini lakhe iBlack Leopards liqala ukuziqeqesha kuleli sonto.