IPHINI lomqeqeshi we-Orlando Pirates, uMandla Ncikazi, aliwuvali umlomo ngoJose Riveiro oyinhloko yomqeqeshi weqembu. Basebenza naye ngokubambisana ekwakheni inqanawe yeqembu eselinqobe izicoco kumasizini amabili nohhafu.
UNcikazi ubekhuluma nabezindaba ngaphambi komdlalo wabakhaya baseSoweto, iPirates neKaizer Chiefs, ozoba ngoMgqibelo ngo-3.30 ntamabama eFNB Stadium, eNasrec. Ngaphansi kukaNcikazi noRiveiro, eZimnyama sezinqobe izicoco ezinhlanu okungezintathu zeMTN 8 nezimbili zeNedbank Cup. Kumasizini amabili edlule, baqede endaweni yesibili kwi-log yePremiership, isicoco sadliwa yiMamelodi Sundowns esisitamuze amahlandla ayisikhombisa.
“URiveiro uyawazi umsebenzi wakhe, akafuniseli ngawo. Uyakwazi futhi nokusebenza nabadlali abasebancane. Usebenza ngokukhulu ukuzikhandla. Ufika enkundleni ngo-8 ukuzoqala ukuziqeqesha kweqembu. Ungumqeqeshi osifundise ukuthi eNingizimu Afrika ukuba ngumqeqeshi akuwona amahora amabili kuphela kodwa kuqala ekuseni kuze kuyoshona ilanga. Ngakho ukuqonda ukusebenza kwebhola lase-Europe, nelase-Afrika, kulisebenzele kahle leli qembu. Siyesekana ekusebenzeni kwethu,” kusho uNcikazi.
Lo mqeqeshi odabuka eHlokozi, KwaZulu-Natal, ujoyine iPirates ngesizini ka-2021/2022 esuka kwiLamontville Golden Arrows, kanye noFadlu Davids bezoba ngamaphini kaJosef Zinnbauer, owayesanda kuthatha izintambo zokuqeqesha kweZimnyama ngaleso sikhathi.
Nangenkathi esehambile uZinnbauer waseGermany, uNcikazi uqhubekile nokuba sethimbeni labaqeqeshi beZimnyama, ejoyina ithimba likaRiveiro odabuka eSpain, ngesizini ka-2022/23 noSergio Almenara oselishiyile iqembu.
UNcikazi noRiveiro bahlalelwe wumsebenzi wokuqhamuka neqhinga lokwehlula iChiefs eholwa nguNasreddine Nabi, noKhalil Ben Youssef esiwine imidlalo emibili ilandelana. Ngesizini edlule, iPirates iyiwine ngomibili imidlalo yeligi, igingqa Amakhosi ngo 1-0 nango 3-2. Nakuba laba baqeqeshi bezobe beqala ukubhekana kodwa kulindeleke ukuthi kubonakala ubuchule nhlangothi zombili.
“KwiChiefs sibona iqembu esidinga amaphuzu kulona. Ngakho sizoya kuyona siyolwela amaphuzu amathathu. Ukuthi-ke lawo maphuzu azosibeka kuphi, yinto engakabalwa leyo. Okwethu wukudlalela ukunqoba umdlalo, nomdlalo esiwudlalayo,” kuqhuba uNcikazi.
Imidlalo yeBetway Premiership:
Kusasa - Ngo-7.30pm:
Richards Bay FC v Magesi FC (King Zwelithini Stadium)
NgoMgqibelo - Ngo-3.30pm:
Marumo Gallants v Royal AM (Dr Molemela Stadium); Orlando Pirates v Kaizer Chiefs (FNB Stadium); Stellenbosch FC v Sekhukhune United (Danie Craven Stadium)
Ngo-5.30pm:
Polokwane City v Chippa United (Old Peter Mokaba Stadium)
Ngo-8pm:
AmaZulu FC v Supersport United (King Zwelithini Stadium)
NgeSonto - Ngo-3.30pm:
TS Galaxy V Cape Town City (Mbombela Stadium)
Ngo-5.45pm:
Mamelodi Sundowns v Lamontville Golden Arrows (Lucas Moripe Stadium)