UKUQALA iCaf Confederation Cup ngomphumela omubi ekuhambeni akuzange kumthene amandla umqeqeshi weStellenbosch FC, uSteve Barker, ngamathuba eqembu lakhe okuphumelela eqoqweni eboshelwwe kulona.
IStellenbosch iqale iConfed Cup ngenduku ka 2-0 emdlalweni ka-Group B, ivela kwiStade Malien yaseMali, ngoLwesithathu ebusuku, e-26th of March Stadium, eBamako.
Leli qembu laseKapa ilona lodwa elimele i-Premier Soccer League (PSL) kuleli qoqo leConfed Cup okukhona kulona i-RS Berkane yaseMorocco neDeportivo da Lunda Sol yase-Angola.
Nakuba bekufanele lo mphumela waseMali umdikibalise uBarker kodwa uthe usale ehlabeke umxhwele ngendlela iqembu lakhe elidlale ngayo ekuhambeni.
Ngesikhathi ekhuluma nabezindaba esithangamini ebesihlelwe yiCaf, ukhombise ukungatheneki amandla ngenxa yomphumela wakucacisa nokuthi ubone kuyiStellenbosch engcono ngokomdlalo.
“Umphumela ukhomba ukuthi sikhale ngaphansi kodwa kobengikubheke emdlalweni wokuqala ekuhambeni nesitha esinomlando ebholeni lase-Afrika kungishiye nganelisekile,” kusho uBarker.
“Amagoli abasishaye ngawo kube amaphutha ethu futhi ngaphandle kwawo ngibone kuyithina igembu elingcono okufakazelwa nawukufika kwethu amahlandla amaningi ezintini zeqembu lasekhaya.
“Akuwona umphumela okufanele usithene amandla lo kepha kufanele usikhuthaze ngoba sizibonile ukuthi sinawo amava okuya enkundleni enomlando ebholeni lase-Afrika sifike siwuphathe ngazo zonke izindlela umdlalo.
“Lo mphumela akufanele usidikibalise kepha kumele siwusebenzise njengesikhuthazi njengoba sibuyela emidlalweni yeligi,” kulandisa yena.
IStellies ibuyela kwiBetway Premiership ngomdlalo onzima ne-Orlando Pirates ngeSonto ngo-3.30 ntambama, e-Orlando Stadium, eSoweto.
IPirates eqale isizini njengomlilo wequbula, izovula amasango e-Orlando Stadium iqhwakele ngamaphuzu angu-21 emidlalweni eyisikhombisa.
IStellenbosh elele isithathu isaqoqe angu-12 esibalweni esifanayo semidlalo.