KUBUKEKA esazoqhubeka nokushintshana ngokuhlala esicongweni amaqembu ahlukene kwiMotsepe Foundation Championship.
Phakathi kwamaqembu asekhombise ukuthola umgqigqo emidlalweni yakamuva yeMotsepe Foundation Championship, kubalwa iCasric Stars, Upington City neBaroka FC. Amaqembu iKwaZulu-Natal, iDurban City neMilford FC yiwona ahlale kuqala esicongweni se-log emuva kwemidlalo emibili yokuvula.
Nokho, iCity edlale neCape Town Spurs izolo neMilford ezodlala neKruger United namuhla ntambama, balahle amaphuzu emidlalweni elandelile okwenze kwahlala phezulu iCasric esilobe lapha singakawutholi umphumela womdlalo wayo wayizolo ne-Orbit College.
IBaroka iqale isizini iqeqeshwa nguMorgan Mammila okhonjwe indlela ngemuva kokungaqali kahle kwaleli qembu emidlalweni emibili yokuvula. Izintambo zithathwe nguFoster Hlungwani okubukeka esayibambe kahle kwazise usewine imidlalo emibili ilandelana. IBaroka, eshaye iHungry Lions neKruger United ngeledlule,inenselelo yokugcina umgqigqo njengoba izobhekana ne-University of Pretoria, kusasa ngo-3 ntambama, eTuks Stadium, ePitoli. Leli qembu laseLimpopo eliqinise isikwati ngokusayinisa abadlali abanamava okubalwa kubona uSiphelele Mthembu osuka kwiPretoria Callies, Collins Makgaka osuka kwiSekhukhune United noSibusiso Mabiliso owayedlala kuMaZulu FC, libalwa namaqembu okubhekwe ukuthi awine iligi kule sizini.
I-Upington, eqede endaweni yesithupha ekubeni ibingomakoti kwiChampionship, isakhombisa ukulangazelela ukwenza kangcono kule sizini. Ngaphambi komdlalo wayo wayizolo neHighbury, ibisendaweni yesihlanu kwi-log. Ukuzimisela kwamaqembu ahlukene kukubeka ngokusobala ukuthi umbango weligi kungenzeka uphele emidlalweni yokugcina yesizini ka-2024/2025.
Imidlalo yeMotsepe Foundation Championship:
Namuhla ngo-3pm:
Kruger United v Milford FC (Mbombela Stadium); Leruma United v JDR Stars (Lucas Moripe Stadium); Black Leopards v Pretoria Callies (Thohoyandou Stadium); Hungry Lions v Venda FC (Suzuki Stadium)
Kusasa ngo-3pm:
University of Pretoria v Baroka FC (Tuks Stadium)