UMQEQESHI weSuperSport United, uGavin Hunt, ukhulume sakukloloda ngokungena kwabo kwiCaf Confederation Cup ekubeni kusale ngaphandle amaqembu athathwa ‘njengomacaphuna kusale’ uma uwaqhathanisa neqembu lakhe ngokwabadlali.
UHunt ukusho lokhu kulandela ukuvala kwabo isizini yeDStv Premiership ngebatha lapho beshaywe khona yiSekhukhune United kodwa bagcina beqede endaweni yesithathu kwi-log ngamaphuzu awu-51, ebafaka kwiConfed Cup.
Lo mqeqeshi, oseke wadla isicoco seligi amahlandla amathathu kulandelana neSuperSort eminyakeni edlule, ubebheke ukuqeda endaweni yesibili kodwa ukushoda ngabadlali kwagcina kubawisele endaweni yesithathu, ngokusho kwakhe.
Yize esabalisa ngokushweba ukungena kwiCaf Champions League kodwa uHunt uzwakalise injabulo yokuqeda endaweni yesithathu.
AMatsatsantsa a Pitori aqede endaweni engcono nekuqede kuyona iqembu lakudala likaHunt, iKaizer Chiefs.
Lo mqeqeshi ubuyisela iSuperSport kwiConfed Cup okokuqala kusukela ngo-2017, ekubeni iqembu lakhe libunjwe ngabadlali abancane nababolekwe kwamanye amaqembu.
Kugcine ngo-2012 ukuthi iSuperSport iqede isizini endaweni yesithathu noma ngaphezulu okwenza uHunt angabe esakwazi ukulinda ukuqala kwesizini ezayo.
“Ngisho kungabukeka sengathi sijabule ngokweqile kodwa kusifanele ngoba sizobe simele iligi kwiConfed Cup ngesizini ezayo,” kusho uHunt kwabezindaba ePolokwane.
“Uma uqhathanisa isikwati sethu nalezo ezamaqembu athathwa njengamakhulu asale ngaphandle, kufanele ukuqonde ukunama kwethu kuze kweqe,” kusho uHunt.
“Kukhulu kakhulu kunalokhu obekulindelekile esikwenzile ngesikwati ebesinaso yingakho kusifanele ukuzigqaja ngokufaka iqembu kwiConfed Cup,” kuqhuba yena.
Uyaqonda nokho uHunt ukuthi uma befuna ukwenza into ebonakalayo kulo mqhudelwano, kufanele bangene bagxile emakethe.
“Ngoba kukhona esizobe sakhela phezu kwakho, ngeke kube nzima kangako emakethe ngoba siyakuqonda esikudingayo ezindaweni esikudinga kuzona.
“Kule sizini kuningi ebesingenakho ngakho-ke kule ezoqala sizoqinisekisa ukuthi sigqishile lapho kufanele khona,” kusonga lo mqeqeshi.
URonald Pfumbidzai, waseZimbabwe obekwiChippa United, ngomunye wabadlali abakhonjwa kwiSuperSport ngesizini ezayo.