UMQEQESHI weMaritzburg United, uFadlu Davids, ukholelwa ekutheni amangwevu awathole ngaphansi kukaJosef Zinnbauer kwi-Orlando Pirates naseTurkey, azomsiza ekuhlengeni iMaritzburg United enyonyobelwa yizembe.
Ngemuva kokuthi iTeam of Choice ihlukane neJohn Maduka emasontweni adlule, kwabanye kubuye injabulo eyisimanga uFarouk Kadodia umnikazi waleli qembu, ememezela izindaba zokubuyisa uDavids.
Phela lo mqeqeshi uthathwa njengedlozi laleli qembu ngenxa yokulwazi lonke usikompilo lweTeam of Choice.
Uqale kulo esengumdlali waphinde waba umqeqeshi kulo. Ngaphandle kokuba umdlali uke waba iphini waphinde waba inhloko yabaqeqeshi.
Uphinde wasebenza kwi-Orlando Pirates ngaphansi kwabaqeqeshi abahlukene okukhona uZinnbauer waseGermany.
IMaritzburg imthathe ngemuva kokuthi ehlukene neLokomotive Moscow yaseRussia kuyo abeyiphini lakhe uZinnbauer.
UDavids ubuyela kwiMaritzburg nje izinto zimapeketwane.
Leli qembu elongaconsi phansi kubantu baseMgungundlovu, lilele endaweni yokugcina kwi-log yamaqembu awu-16, ngamaphuzu awu-11, emidlalweni ewu-13.
Leli phephandaba likhuluma noDavids, uqinisekise izakhamuzi zaseMphithi ukuthi iqembu aliyi ndawo.
"Ngilibonga kakhulu ithuba engilinikwe usihlalo. Engithanda ukukuveza kubalandeli beMaritzburg ukuthi ngizolwa ngakho konke okusemandleni ukuvikela leli qembu ukuthi lingayi ehlathini. Engikuthandayo ukuthi usikompilo lwale liqembu ngiyalazi.
“Nakumina kubuhlungu ukubona iqembu elingikhulisile likulesi simo. Ngikhuluma nawe nje kasivalile, senzela ukuthi uma kubuywa ekhefini sibe sisesimeni esihle," kubeka uDavids oneziqu zokuqeqesha ze-Uefa A Licence.
Imidlalo yeligi isamile njengoba kuqhubeka iNdebe yoMhlaba eQatar. Lokhu kusho ukuthi uDavids unenyanga yonke ukulungisa izinto ngaphambi kokuthi babhekane neTS Galaxy ngoDisemba 30, eHarry Gwala Stadium.
Echaza lo mqeqeshi ukuthi uwuthole kanjani lo msebenzi, uveze ukuthi ushayelwe ucingo usihlalo uKadodia.
"Vele ngaphambi kokuthi ngiye eRussia ,besixoxa nosihlalo. Sihlale sixoxa. Kuyiko nje ukuthi ngaleso sikhathi iMaritzburg beyisenaye umqeqeshi. Njengoba bengike ngasho, ngilibonga kakhulu ithuba engilinikwe usihlalo Nakuba ngingeke ngande kakhulu kodwa sisazohlala phansi nobuholi beqembu sibone ukuthi iqembu siliqinisa kephi futhi kanjani. Kukhona okumele kwenziwe,“ usho kanje.
UDavids uchaze ukuthi kulezi zinyangana ezimbalwa eseRussia ufunde lukhulu.
"Ngithanda ukubonga kakhulu kumqeqeshi uZinnbauer ngokukholelwa kimina. Ukungethemba ukuqale ngisekwi-Orlando Pirates waphinde wangilanda noma eseseRussia. Ngaphandle kokufunda okuningi kwiLokomotiv Moscow, ngibuye ngacobelela kokuningi kwamanye amaqembu nangendlela izinto ezenziwa ngayo kwiligi yaseRussia," Kuqhuba uDavids.