KUZOHLANGANA imihlathi eyazanayo emidlalweni yamaqoqo yeCaf Champions League neyeConfederation Cup ethinta amaqembu athunyelwe yi-Premier Soccer League (PSL) kule miqhudelwano kulandela ukuqhathwa kwawo ngesonto eledlule, eGoli.
IMamelodi Sundowns osekuyiyona esele kwawePSL kwiChampions League itonyulwe ku-Group A nePyramids FC yase-Egypt, TP Mazembe eqhamuka eDemocratic Republic of Congo (DRC) neFC Nouadhibou yaseMauritania.
Kuleli qoqo iSundowns izonqwamana neMazembe edlule kuyona kunzima endleleni yayo ebibheke esicocweni seChampions League ngo-2016.
Eqoqweni elifanayo iSundowns izozithola ibhekene ngqo nomgadli weBafana Bafana, uFagrie Lakay, osemabhukwini futhi oyisithenjwa sePyramids.
ULakay usedlale kaningi neSundowns kwazise uqale wagqama kwiCape Town City ngaphambi kokuthengwa ileli qembu leziqumama zase-Egypt.
Kulo mqhudelwano (ku-Group D) kuzophinde kubhekane, uMahlatse Makudubela weYoung Africans yaseTanzania nomgadli weBafana, uPercy Tau, osephenduke esinye sezithenjwa kwi-Al Ahly yase-Egypt.
KwiConfederation Cup, iSuperSport iseqoqweni elinzima (Group A) ne-USM Alger yase-Algeria, Future FC yase-Egypt ne-Al Hilal yaseLibya.
Lilukhuni satshe leli qoqo uma kukhumbuleka ukuthi kube wumqansa ongakanani ukudlala namaqembu asenhla ne-Afrika kule miqhudelwano.
Elinye iqembu elisele kwiConfedaration Cup kwathunyelwe yi-PSL, iSekhukhune United eku-Group D neRS Berkane yaseMorocco, Diables Noir yaseCongo-Brazzaville nezinkunzi zaseMali, iStade Malien.
Imidlalo yamaqoqo kule miqhudelwano yomibili izoqala ngasekupheleni kukaNovemba ize isongwe ngoMashi wonyaka ozayo.
Esewonke amaqoqo ami kanje:
KwiCaf Champions League:
Group A: Mamelodi Sundowns, Pyramids FC (Egypt), TP Mazembe (DR Congo), FC Nouadhibou (Mauritania).
Group B: Wydad Casablanca (Morocco), Simba (Tanzania), Asec Mimosa (Ivory Coast, neJwaneng Galaxy (Botswana).
Group C: Esperance (Tunisia), Petro de Luanda Angola), Al Hilal (Sudan), Etoile du Sahel (Tunisia).
Group D: Al-Ahly (Egypt), CR Belouizdad (Algeria), Young Africans (Tanzania), Medeama (Ghana).
KwiCaf Confederation Cup:
Group A: USM Alger (Algeria), Future FC (Egypt), SuperSport United, Al Hilal (Libya).
Group B: Zamalek (Egypt), Sagrada Esperança (Angola), SOAR (Guinea), Abu Salim (Libya).
Group C: Rivers United (Nigeria), Club Africain (Tunisia), Dreams FC (Ghana), APC Lobito (Angola).
Group D: RS Berkane (Morocco), Diables Noir (Congo), Stade Malien (Mali), Sekhukhune.