I-KAIZER Chiefs ihlela ukumnika inkontileka entsha umgadli uKhama Billiat obekuvele ukuthi ufunwa yiqembu laseTanzania.
Amakhosi ashaye into ephansi ngesizini edlule eqeda endaweni yesihlanu kwi-log yeDStv Premiership ngaphansi kobuholi bomqeqeshi u-Arthur Zwane.
Kumanje abaphathi beChiefs babhunga eyezindlela zokulungisa lesi simo. Imiphumela yalokhu izothinta abadlali nabaqeqeshi njengoba kuvela ukuthi uzogudluzwa uZwane ngemuva kokuvela kwezindaba zokuthi leli qembu lifuna uNasreddine Nabi (57) waseTunisia ongumqeqeshi weYoung Africans (Yanga) yaseTanzania.
Okwamanje bathathu kuphela abadlali okuvela ukuthi sebesayiniswe yiChiefs okunguThatayaone Ditlhokwe obegijima kwiSuperSport United, uGiven Msimango obeyibamba kwiTS Galaxy noMduduzi Mdantsane obedlalela iCape Town City. IChiefs isaqinisekise u-Eric Mathoho kuphela kubadlali abahambayo.
Umthombo osondelene neChiefs udalule ukuthi kubukeka ezogixabezwa ngenkontileka entsha uBilliant uma iphela ekupheleni kwenyanga lena anayo. Lo mgadli waseZimbabwe uchithe isikhathi eside elimele ngesizini edlule. Udlale imidlalo eyishumi kwiligi, wakha amagoli amathathu.
"Kade kucutshungulwa yonke isizini edlule, kubhekwa izibalo zomdlali ngamunye neqembu lonke. UKhama udlale imidlalo engu-10, wakha amagoli amathathu. Nakuba lokhu kungesona isibalo esiphezulu, ikakhulukazi uma ubheka ukuthi akashayanga nelilodwa igoli kodwa wenze kangcono kunabanye abadlale imidlalo eminingi.
“Kubukeka sengathi uKhama uzohlala kwiChiefs. Abaphathi bakholwa wukuthi iqembu belizokwenza kangcono ukuba ubekhona emidlalweni eminingi," kusho umthombo.
Kungenzeka ukuthi ukugcinwa kukaBilliat eNaturena kuhlangene nomqeqeshi emfunayo uNabi.
Entintwa okhulumela iChiefs, uVina Maphosa, ukhale ngokuba usendaweni enomsindo kodwa wagcina engawuphendulanga umyalezo athunyelelwe wona.
IChiefs izovula ngesonto elizayo, izoqala amalungiselelo esizini ka-2023/2024.
Phambilini, ngesikhathi kuthintwa iphini likamengameli weYanga, u-Araf A Haj ngodaba lukaBilliat, wathi: "Uwumdlali wezinga eliphezulu esingathanda ukuba naye eqenjini lethu. Siyamazi futhi siyazi ukuthi iyaphela inkontileka yakhe. Nokho usengumdlali weChiefs, kumele sikuhloniphe lokho.“
Inkontileka kaBilliat neChiefs inombandela wokuyivuselela ngesizini eyodwa.
Kule sizini uhlushwe kakhulu wukulimala waze wahlinzwa.
Udlale eyisishiyagalolunye kuphela yeligi nemibili yeMTN8. Selokhu efikile eNaturena useshaye amagoli awu-24, emidlalweni ewu-125.