UKULANKANYANA eduze kwemidlalo yokuqala yesizini ka-2023/2024 yePremiership, kuzolekelela ekutheni lusheshe lucace unyawo okubuya ngalo iMamelodi Sundowns, okuphele isizini eydlule isiphenduke inunu.
ISundowns izobe ilwela ukusivikela okwesithupha nokusinqoba kasikhombisa kulandelana isicoco seligi iSundowns, enemidlalo yeligi eyisishiyagalombili ezinyangeni ezimbili zokuqala zesizini.
Akuzizo nje kuphela izimbangi zayo iSundowns ezibheke ngabomvu ukubona ukuthi ibuya ngonyawo olunjani, kodwa ngesifanayo kubo bonke abathandi bebhola eNingizimu Afrika ngisho nase-Afrika imbala.
Kuzobe kuyisizini yokuqala esuka nayo phansi kuleli qembu laseTshwane uRhulani Mokwena, othathe esokuba yinhloko sekudlule imidlalo esondele eshumini ngesizini edlule.
UMokwena ugile izimanga ngeSundowns eshaya kwasani obekuvuka endleleni ngendlela yokuthi kuqala lo nyaka ukukhuluma kumkhomba ekusongeni isizini nezicoco ezintathu.
Sekuwumlando nokho ukuthi bagcine behambe nesicoco seligi sodwa kwazise kwiNedbank Cup bagotshwe yiStellenbosch uphondo kwamangala wonke umuntu kuma-quarterfinal.
KwiChampions League banqunywe yiWaydad kuma-semifinal ekubeni bebedlule emidlalweni yamaqoqo bengakaze behlulwe.
Konke lokhu kucasule abalandeli bezimbangi, ikakhulu abamaqembu aziwa njengamakhulu, i-Orlando Pirates neKaizer Chiefs bashaya indesheni kwashona ilanga becela izikhulu zabo zibathengele abadlali abazoqeda ukucanasa kweSundowns.
Imidlalo ezodlalwa yeSundowns ngo-Agasti nangoSepthemba, yanele ukunika isithombe sokuthi ngabe iyanqandeka yini.
EzikaMokwena zizovula isizini ngeSekhukhune United ngo-Agasti 4. ISekhukhune izobe izozwa amanzi ngobhoko kwiSundowns kwazise iya kwiConfederation Cup.
ISundowns ihlezi ikhona kwiCaf.
Kuzolandela iChiefs ngo-Agasti 9 bese kulandela iLamontville Golden Arrows ngo-Agasti 19.
IRichards Bay, okuyiwe kuKhisimusi nyakenye iphefumula entanyeni yompetha, izolandela ngo-Agasti 27.
Omakoti abashaya ibuya, iPolokwane City yibo iSundowns ezosonga ngabo inyanga yabesifazane ngo-Agasti 30.
Kuzobe sekulandela iChippa United ngoSepthemba 16 ngaphambi kwePirats ngomhla ka 19 bese kuba yiStellenbosch ngoSepthemba 30.
IMoroka Swallows, okungumdlalo okuzobe kuhlangana ngawo uSteve Komphela nozakwabo abadala, ilandela ngo-Okthoba 29.