KUFANELE ukuba kuconsa amathe emaqenjini eDStv Premiership azimisele ukuqinisa izikwata zawo ngesizini ezayo uma ebuka uhla lwamagama abadlali asebengaqala bakhulume nezesheli kwazise sebesezinyangeni eziyisithupha zokugcina ezinkontilekeni zabo.
Njengoba sekusele imidlalo embalwa ukuba kugoqwe isizini ka-2023/2024, amaqembu asezoqala apheke ethulula ngenhloso yokuqinisa izikwata zawo zangesizini ezayo.
Uhla lwabadlali amaqembu asengaqala adlane indlebe nabo lugqishe ngayo yonke inhlobo kusukela kwasebeke badla imiklomelo emikhulu kwiPremier Soccer League (PSL) kuya kwabanesipiliyoni sokudlalela amaqembu ase-Europe.
Izinyanga zokugcina eziyisithupha zinika abadlali namaqembu abaphelelwa yizinkontileka ngoJuni igunya lokushelana.
Kulapho kuqala khona namahlebezi abadlali abangase bashiye amaqembu abo ngoba sebethenjiswe izulu nomhlaba engxenye.
Kusukela kwiMamelodi Sundowns, Orlando Pirates, Kaizer Chiefs kuze kuyofika kuMaZulu FC, kunenqwaba yabadlali okungaqondakali noma zisazovuselelwa yini izinkontileka zabo eziphela ngoJuni nonyaka noma bazodedelwa bacoshwe amanye amaqembu bhusende.
Abaphelelwa izinkontileka kwiSundowns akubukeki sengathi bazodedelwa ngoba kubona kukhona isethenjwa, esinguThemba Zwane noqweqwe lukanozinti wase-Uganda, uDenis Onyango.
Akuzibeki nokho ukuthi baningi kwiPirates abadlali abaphelelwa yizinkontileka ekubeni leli qembu lingakasho lutho ngabo.
Isishoshovu somgadli oqhulula amagoli kulezi zinsuku, uTshegofatso Mabasa, yisona esiseqhulwini ohlwini lweBucs lwabaphelelwa izinkontileka ngoJuni 30 kulandele uKermit Erasmus, Thabang Monare, Bandile Shandu, Siyabonga Mpontshane noRichard Ofori.
Bonke laba badlali bangangena kalula kunoma yiliphi iqembu esigabeni esikhulu yize kusengenzeka iPirates imemezele ukuvuselela izinkontileka zabanye uma sekuqedwe konke ngesizini.
KuMakhosi adonsa kanzima kwiDStv Premiership kule sizini nakhona kunenqwaba okungakashiwo lutho ngekusasa layo.
Abadlali okugqame kubona, u-Edmilson Dove, Siyethemba Sithebe, Njabulo Ngcobo noGeorge Matlou oseke wadlala kwi-AD Sanjoanense yasePortugal phambilini.
Baningi nabanye abadlali abanegama ebholeni lakuleli abaphelelwa yizinkontileka abakwamanye amaqembu njengoSibusiso Vilakazi noDaniel Cardoso beSekhukhune United, Samir Nurkovic (TS Galaxy), Ben Motshwari noRiaan Hanamub bobabili baMaZulu, Thamsanqa Mkhize (Cape Town City), Thulani Hlatshwayo (SuperSport United) noMenzi Masuku weRoyal AM.