IQEMBU labesifazane leMamelodi Sundowns liqinise isikwati salo ngokusayinisa umdlali oqhamuka kuSafa KZN Sasol League.
U-Asanda Hadebe (21) odabuka eHammarsdale ubedlalela iSunflower Ladies edlala kwiSasol League nalapho ebewukaputeni khona.
Ungomunye wabadlali abakwazile ukudonsa iso lomqeqeshi weqembu lesizwe, uDesiree Ellis njengoba ebesemubize izikhawu eziningi yize edlala esigabeni esiphansi kuneHollywoodbets Super League lapho kugijima khona iSundowns.
Umdlalo wakhe wokuqala eqenjini lesizwe wawugijima ngo-Okthoba 2021, eneminyaka engu-16 bedlala neMozambique emdlalweni wokuhlungela i-Women's Africa Cup of Nations.
Akagcinanga lapho njengoba ebiziwe eqenjini labadlali abangu-30, u-Ellis azokhetha kulona labangu-23 elizodlala imilenze emibili neNigeria kweyokuhlungela ama-Olympics.
UHadebe ungumdlali wesithathu iqembu iSundowns elimsayinisile njengoba liphinde laqinisa ngoNthabiseng Majiya no-Cimone Sauls.
Umqeqeshi we-Sunflower FC, uSiyabonga Malinga ekhuluma neSolezwe uthe ukuhamba kuka-Asanda kuzovulela abanye amathuba.
"U-Asanda usiqedile isikole sokuthuthukiswa kwakhe ngokwebhola njengoba ubusumbona ephuma engena kwi-Banyana Banyana, yize ebedlala kwi-Sasol KZN league.
“Besekufike isikhathi sokuthi ayobhekana nezinye izinselelo ezingaphezulu ukuze ibhola lakhe likhule lidlondlobale. Asilahlekelwanga njengeqembu le-Sunflower FC kodwa uvulele abanye o-Asanda ukuthi bathole ithuba lokubonakala," kusho uMalinga.
Umchaze njengomuntu ozithobile, olalelayo imiyalelo uma etshelwa njengoba waqala ukudlala kuleli qembu le-Sunflower FC ngo-2013 eneminyaka engu-10.
Khonamanjalo yize iSundowns ihlulwe okokuqala kule sizini, ishaywa i-UWC ngo 1-0 ngesonto eledlule, isazihola phezulu kwi-log ngamaphuzu awu-12 emidlalweni emihlanu ngemuva kwemidlalo yangempelasonto.
Labo mpetha bangesizini edlule, babe sebekhiphela isibhongo kwiDurban Ladies abayibhudluze ngo 5-1 kowangempelasonto edlule.
Ngemuva kwabo kukhona i-University of Pretoria enamaphuzu alinganayo bese indawo yesithathu ibanjwe i-UJ ngamaphuzu awu-10.
Imiphumela yangempelasonto yeHollywoodbets Super League: Richmond United 1-1 CopperBelts; JVW 5-1 University of Fort Hare; TUT 4-1 City Lads; TS Galaxy Queens 1-4 University of JHB; Thunderbirds Ladies 1-3 University of Pretoria; Royal AM 1-1 UWC; Mamelodi Sundowns 5-1 Durban Ladies; Lindelani Ladies 1-4 First Touch.