Mamelodi Sundowns Ladies 2 - 0 Double Action Ladies
IMAMELODI Sundowns iqinise umlando wayo ebholeni labesifazane e-Afrika izibekisela okwesithathu indawo kwiCaf Women’s Champions League ezodlalelwa e-Ivory Coast ngoNovemba.
Lo mlando iSundowns ingene kuwo ngokubhuquzisa iDouble Action Ladies ngo 2-0 kowamanqamu wokuhlunga iqembu elizomela iCosafa kulo mqhudelwano.
Umdlalo ubuseSugar Ray Xulu Stadium, eClermont ngoLwesihlanu ntambama.
ISundowns ihambe phambili ngegoli likaChuene Morifi elixhophe unozinti wezihambi ngomzuzu wesihlanu, wasala ebamba ubala emoyeni.
Umlando weSundowns Ladies ulokhu uqhubekile ukukhula eNingizimu Afrika ngokunjalo nakwiCaf.
Lokhu kungenxa yokuthi selokhu uqaliwe lo mqhudelwano weChampions League yabesifazane, ibalwa namaqembu ahamba phambili ngokungena kuwo.
Empeleni ngokwesithathu iyodlala kulo mqhudelwano kwazise iqala ukungena kuwo nawo uqala ukudlalwa, ibuye negolide.
Emdlalweni wayizolo, uMorifi ubeboshelwe ophondweni lwesokunxele kwazise ubelokhu ebangenile kodwa kube yikho ukwenqaba kwamathuba.
Eqinisweni ukhande elinye ithuba ngomzuzu ka-26 efaka ibhola ebhokisini leDouble Action neliwele ezinyaweni zikaNhlanhla Mthandi, ogange ngomsebenzi ngokulifaka khaxa, esikhwameni sikanozinti ibhola.
NguBoitumelo Rabale, weSundowns odabuka eLesotho ophikwe yinhlanhla eshaya ipali, yaphumela ngaphandle imbokodo yeshodi ayidonse ngenxele engaphandle kwebhokisi ngomzuzu ka-32.
Ziye ekhefini liselilodwa igoli ebhodini, esiwombeni sesibili iminyakazo kaMorifi iphinde yadala ububhudubhudu ebhokisini leDouble Action nobuphethe ngegoli likaMthandi nokuyilo eliqede umcimbi.