IMAMELODI Sundowns Ladies izibeke kwelinye ithuba lokuphinda ifinyelele kowamanqamu weCaf Women’s Champions League ngokushaya iSporting Club Casablanca yaseMorocco ngo 1-0 eStade Amadou Gon Coulibaly, eKhorhongo, eIvory Coast, ngoLwesithathu.
Yize iSundowns Ladies isasalelwe ngumdlalo wokugcina esigabeni samaqoqo, kuGroup A, ezowudlala ne-Athletico Abidjan yase-Ivory Coast, namuhla ngo-10 ebusuku, kodwa seyivele izibekisele indawo kweyandulela owamanqamu weWomen’s Champions League njengoba kuyiyona esaqhwakele phezulu kuGroup A ngamaphuzu ayisithupha.
Iqale isigaba samaqoqo ngesivuthevuthe ivulela isibhaxu sika 2-0 kwiJKT Queens yaseTanzania, yabe isilandela ngeSporting Club Casablanca.
Imidlalo eyandulela owamanqamu alo mqhudelwano weWomen’s Champions League obanjelwe e-Ivory Coast, izodlalwa ngoLwesithathu, kuthi owamanqamu udlalwe ngoMgqibelo ozayo.
ISundowns Ladies okuyiyona eyakhangula isicoco seCaf Champions League ngo-2021, ngokuguqisa iHasaacas Ladies yaseGhana ngo 2-0 kowamanqamu, ayikwazanga ukusivikela isicoco sayo ngesizini edlule ka-2022 ibhaxatshulwa ngo 4-0 yi-AS FAR yaseMorocco kowamanqamu.
Nokho, kulokhu i-AS FAR kubukeka emancane kakhulu amathuba okuthi isivikele isicoco sayo, njengoba ingakanqobi nowodwa umdlalo kuGroup B.