UYAQHUBEKA nokudlondlobala phesheya umgadli weBanyana Banyana, uThembi Kgatlana, oshaye igoli lakhe lokuqala eqenjini alidlalelayo lase-United States of America (USA), iRacing Louisville, izolo ekuseni.
UKgatlana uvalele igoli leRacing lesibili ngasekuqaleni kwesiwombe sesibili ngesikhathi bethela phansi iNew Jersey/New York Gotham ngo 2-0 emdlalweni weNational Women’s Soccer League.
Lo mgadli uchithe izinyanga eziyishumi engadlali ngemuva kokulimala umsipha ohlanganisa isithende nomlenze. Walimala ngesikhathi edlalela iqembu lesizwe esigabeni samaqoqo kwiWomen’s Africa Cup of Nations, eMorocco nyakenye.
Udlale umdlalo wakhe wokuqala kwiRacing ngoMeyi 7 ephuma ebhentshini bebhekene ne-Orlando Pride. Kusukela lapho usedlale kweminye eyisithupha yeligi nemibili yomkhumulajezi kwi-NWSL Challenge Cup.
“Ngingumgadli ngakho ngihlale ngilambele ukuhlohla amagoli. Ngisanda kubuya ekulimaleni futhi ngaphambi kokuthi ngishaye leli goli bengiwatholile amanye amathuba kodwa kwangenzeka,” kusho uKgatlana kwi-website yeRacing.
“Ngicabanga ukuthi ukuzimisela kwami nokuphokophela phambili ngingadikibali, yikhona okuholele ekutheni ngigcine ngilitholile leli igoli. Ngihlale ngihlose ukubanika ubunzima abadlali basemuva.”
UKgatlana udlale imizuzu engu-84 kulo mdlalo, waphinde waqokwa njengomdlali ovelele, okufanele kube yizindaba ezinhle kumqeqeshi weBanyana Banyana, uDesiree Ellis, njengoba kubukeka sengathi usekulungele ukuqala imidlalo aphinde ayiqede.
Njengamanje iBanyana isekhempini eGoli ehlanganise bonke abadlali abadlala kuleli kanye nedlanzana elidlala phesheya.
Abanye abazinze phesheya kulindeleke ukuthi baqhubeke nokuthheleka emasontweni ezayo ngaphambi kokuthi kuphele inyanga ephezulu, bazoba yingxenye yamalungiselelo eNdebe yoMhlaba ezoqala ngoJulayi 20 e-Australia naseNew Zealand.
Khonamanjalo, nakuba imidlalo eminingi yeHollywoodbets Super League imisiwe ukuze abadlali baye ekhempini, amanye amaqembu angathintekile asadlala.
IRoyal AM inyukele endaweni yesine iguqisa iCopperbelt FC ngo 3-0 eMpumalanga Stadium, eHammarsdale, ngempelasonto. Isinamaphuzu angu-37 emidlalweni engu-18.
IDurban Ladies ibambane ngo 1-1 neRichmond United eSugar Ray Xulu Stadium, yazibeka endaweni yesishiyagalolunye ngamaphuzu angu-25 emidlalweni engu-18.
ICoal City Wizards izikhiphile endaweni eyingozi kwi-log ishaya iThunderbirds Ladies ngo 2-0 eSisa Dukashe Stadium, e-East London.
Ukunqoba lo mdlalo kwenze iWizards yanyukela endaweni ka-14 ngamaphuzu angu-10 emidlalweni engu-18. Iyishiya ngephuzu elilodwa iThunderbirds bese ihamba phambili ngamaphuzu amane kwiMa-Indies, okungamaqembu asengcupheni yokugawulwa yizembe njengamanje.