LIZIMISELE ngokungena emqhudelwaneni iCaf Women's Champions League, lisawubambile umgqigqo omuhle wakamuva iqembu elizomela izwe emqhudelwaneni, iMamelodi Sundowns Ladies.
Leli qembu lagcina ukuqhuzuka kwiligi yakuleli, iHollywoodbets Super League, ngesikhathi liguqiswa yiTshwane University of Technology (TUT) ngo 1-0 ngenyanga edlule.
Kusukela lapho selinqobe imidlalo eyisishiyagalolunye ilandelana futhi lingangenelwa ngamagoli. Kwemibili yokugcina lihlohle amagoli ayisishiyagalolunye libhekene neCoal City Wizards, nayisishiyagalombili liguqisa iFirst Touch ngempelasonto.
EzikaJerry Tshabalala ziqhwakele kwi-log ngamaphuzu angu-73 emidlalweni engu-27. Lo mqeqeshi uthe vele sebesivikele isicoco seSuper League njengoba lingekho iqembu elisengakwazi ukuqoqa amaphuzu afinyelela kwangu-70 emidlalweni esele.
AmaSandawana azophinde adudulane neCoal City Wizards ePuma Stadium eWitbank, namuhla ngo-3 ntambama ngaphambi kokuthi alubangise eMorocco.
"Kuhle ukuthi sizoya kwiChampions League sesisithathile isicoco seligi ngoba kuzokwenza ukuthi sidlale ngokukhululeka singazikhathazi ngokwenzeka kwiligi yasekhaya. Senza okufanayo ngesizini edlule futhi kwasisiza kakhulu," kusho uTshabalala.
"Sizimisele ukuthi singabe sisawuyeka umgqigqo esikuwona wokunqoba imidlalo, ikakhulukazi owokuvala emuva ngoba kumqoka kakhulu ukungangenelwa ngamagoli kwiChampions League. Noma ungashaya igoli elilodwa uyakwazi ukunqoba uma uvale ngci emuva.
"Nakuba izinto zisihambela kahle kwiligi yasekhaya kodwa sesiyazi ukuthi sizobhekana namaqembu asezingeni eliphezulu eMorocco. Asizikhohlisi ngokuthi kuzoba lula njengoba kujwayele ukwenzeka uma sidlala ekhaya.“
Yize ezikaTshabalala sezikhale zemuka nesicoco seSuper League kodwa usemkhulu umbango wokulala isibili, okuyindawo esabanjwe yiTUT ngamaphuzu angu-51 emidlalweni engu-24.
I-University of Western Cape ilandela eduze ngamaphuzu angu-47 emidlalweni engu-23, nayo isamiswe kabi yiJVW enamaphuzu angu-45.
Amaqembu alengelwa yizembe yiTsunami Queens, esemsileni ngamaphuzu ayisithupha emidlalweni engu-25, neGolden Ladies esendaweni ka-15 ngamaphuzu ayisishiyagalolunye.
Uma lawa maqembu egcine ehlulekile ukuqoqa amaphuzu emidlalweni yokugcina, azokwehlela ehlathini kwiSasol League, izikhala zawo zithathwe yiCopperbelt Ladies yaseLimpopo, esanda kudla isicoco seSasol League National Championships, ne-University of Pretoria, eguqe kowamanqamu kweyeSasol.
Imidlalo yeHolllywoodbets Super League:
Namuhla - Ngo-3pm: Durban Ladies v Ma-Indies Ladies (Sugar Ray Xulu Stadium); Golden Ladies v Bloemfontein Celtic LAdies (Montshoua Stadium), First Touch v JVW (Noordelikes Sports Fields), Coal City Wizards v Mamelodi Sundowns (Puma Stadium), City Lads v Richmond United (Isaac Wolfson Stadium), Vasco da Gama v Thunderbirds Ladies (Parow Park), University of Western Cape v Tsunami Queens (UWC Stadium), University of Johannesburg v Tshwane University of Technol;ogy (UJ Stadium).