Banyana Banyana (0) 1
Tanzania (0) 0
IBANYANA Banyana idlulele emzuliswaneni wokugcina wokuhlungela ama-Olympic ngesikhathi inqoba iTanzania ngo 1-0 eMbombela Stadium, eMpumalanga, ngoLwesibili ebusuku.
Igoli lishaywe ngukaputeni uThembi Kgatlana maphakathi nesiwombe sesibili.
Isizobhekana neNigeria ngo-Ephreli emzuliswaneni wokugcina wokubanga ithikithi lokuya kuma-Olympic azobanjelwa eParis, eFrance, ngoJulayi.
ISuper Falcons idlule kwiCameroon ngo 1-0 uma sekuhlanganiswe imilenze emibili.
Iqembu lakuleli belingene kulo mdlalo lihamba phambili kulandela ukubhaxabula iTwiga Stars ngo 3-0 emlenzeni wokuqala odlalelwe ekuhambeni, eDar es Salaam ngoLwesihlanu olwedlule.
Umqeqeshi weqembu lakuleli, uDesiree Ellis, wenze izinguquko eqenjini eliqale umdlalo. Emuva ufake uFikile Magama endaweni kaLebohang Ramalepe, uLonathemba Mhlongo wangena esikhaleni sikaNoko Matlou.
Esiswini kungene u-Amogelang Motau endaweni kaKholosa Biyana, kwathi uGabriela Salgado wangena kwekaHildah Magaia.
UJermaine Seoposenwe, obedlala umdlalo ka-100 eqenjini lesizwe, uqale phambili noKgatlana.
U-Ellis ubelokhu egcizelela ngaphambi komdlalo ukuthi ufuna iqembu lakhe liyibhakuzise kuqala inethi kulo mdlalo. Kubonakalile ngegiya iBanyana eqale ngalo kodwa ihluleka uma isifike ebhokisini.
Ngemuva kwemizuzu engu-20 izivakashi bese ziqala ukuphaselana ibhola kodwa kungenzeki minyakazo eyingozi.
IBanyana isheshe yenza ushintsho ngomzuzu ka-36, ifaka uRamalepe endaweni kaNoxolo Cesane, obeseke wathinteka emlenzeni nasebusweni.
ITanzania ilibeke enethini ngomzuzu ka-38 ngekhanda likaStomai Athumani kodwa igoli langabalwa ngenxa yokuthi ubesemhlabeni ongafanele, kwayiwa ekhefini zibambene ngo 0-0.
Igoli elisemthethweni lize langena ngomzuzu ka-58 ngesikhathi uBiyana, ongene esiwombeni sesibili, ebeka ibhola ebeliyi-freekick onyaweni lukaKgatlana ebhokisini, walivalela phakathi.
Kuphoqeleke ukuthi uBiyana akhishwe ngomzuzu ka-67 ngenxa yokulimala, isikhala sakhe savalwa nguLesego Nkoane. Nokho iBanyana ikwazile ukuwulawula, yagcina inqobe ngo 1-0.